भांगरभूंय | प्रतिनिधी
म्हजें मत
बार्देसांतल्या हडफडें – नागवें गांवच्या इतिहासांत पयलेच खेपे तांबुडकी वाड्यार बांदिल्ल्या बॅडमिंटन कोर्टाक आदले सरपंच आग्नेल डिसोझा रावतो हांचें नांव दिलां. सरपंच रोशन रेडकार, उपसरपंच सुषमा नागवेंकार, कोमोनिदाद अटर्नी ऍशले डिसोझा आनी हेर पंचायती वांगड्याच्या हाजिरेंत आमदार मायकल लोबो हांणी मैदानाचें उक्तावण केलें.
खेळगड्यांक नवो बॅडमिंटन कोर्ट बांदून दिल्ले खातीर ग्रामपंचायत मंडळाक परबीं. बॅडमिंटन कोर्टाक आग्नेल डिसोझा हांचें नांव फावता. ते शांत, सादे आनी सौम्य सभावाचे आशिल्ले. तांणी जायते फावट सरपंच आनी उपसरपंच म्हणून काम केल्लें. हडफडें नागवें कोमुनिदादीच समितीचेरुय ते आशिल्ले. एक बरो मनीस आनी निवळ राजकी कारकीर्द आशिल्ले समाजीक वावुरपी. देखून ते वादांचे भायर आशिल्ले. ते ‘सरपंच द कूल’ म्हण फामात आशिल्ले. गांवचे प्रस्न शांतपणान सोडयताले. देखून बॅडमिंटन कोर्टाक नांव दिवपा खातीर आग्नेल डिसोझाचो उगडास करप हो पंचायतीचो बरो निर्णय. बऱ्या मनशांचो इतिहास सदांच तिगून उरचो.
खरें म्हणल्यार हडफडें -नागव्यां गांवांत आनीक बॅडमिंटन कोर्ट आसात. पूण नशीब म्हणटा तशें, आग्नेल डिसोझा हे बॅडमिंटन कोर्टाक नांव मेळिल्ले पयले आदले सरपंच. हो सैमीक स्वाभिमान जिणेंत मेळोवंक जाय. ताका लागून सर्गेस्त आग्नेल डिसोझा आनी ग्रामपंचायतीक परबीं. जिणेंत सगळ्यांत बरें मेळोवचें आनी सगळ्यांक बरें नाव मेळचें. ताका लागून स्व. आग्नेलो डिसोझाचो आत्मो खूब खोशी जाल्लो आसूंक जाय. आतां हडफडेचीं भुरगीं बॅडमिंटन चॅम्पियन म्हणून उदेवचीं ही आशा.
राजेश बाणावलीकार,
वेगासवाडो- हडफडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
