भांगरभूंय | प्रतिनिधी
साळगांव, काकोडें प्रकल्पांत जातली प्रक्रिया
पणजी : सोनसडो यार्डांत सांठयिल्ल्या कोयराचेर उपाय काडपाक मुख्यमंत्री डॉ. प्रमोद सावंत हांणी मंगळारा सांजे वयल्या पांवड्या वयली बसका घेतली. संबंदीत कोयर साळगांवां वा काकोडें कोयर प्रकल्पांत व्हरून ताचेर प्रक्रिया करपा विशीं बुधवारा निर्णय जातलो, अशी म्हायती गोपांनी दिली.
मुंबय उच्च न्यायालयाच्या गोंय खंडपिठान सोनसडो कोयरा विशींचे याचिकेचेर सोमारा सुनावणी घेतली. त्या वेळार थंय उजो लागपाच्यो घडणुको, कोयर प्रक्रिया संदर्भांतल्यो त्रुटी, साधनसुविधा उबारणे खातीर जावपी कळाव हांचो उल्लेख केल्लो.
हाची दखल घेवन खंडपिठान दक्षीण जिल्हो आपत्कालीन वेवस्थापनाचे अध्यक्ष तशेंच दक्षीण गोंय जिल्होधिकाऱ्यांक प्रत्यक्ष पळोवणी करून मंगळारा खंडपिठांत हजर रावपाक सांगिल्लें. ते प्रमाण जिल्होधिकारी अश्वीन चंद्रू ए (आयएएस) हांणी सोनसडोंतल्या कोयर यार्डांत सांठयिल्लो कोयर आनी हेर सुविधांचो नियाळ सोमारा दनपारां घेतलो. मंगळारा खंडपिठांत हजर रावन तांणी हे विशींचो अहवाल सादर केलो.
मजगतीं, अॅड. जनरल पांगम हांणी संबंदीत अधिकाऱ्याची बसका घेतली. ते उपरांत मुख्यमंत्री डॉ. प्रमोद सावंत हांणी वयल्या पांवड्या वयलीं बसका घेतली. तातूंत मडगांवचे आमदार दिगंबर कामत आनी हेर अधिकारी हाजीर आशिल्ले.
मेळिल्ले म्हायती प्रमाण सोनसडो यार्डांत सांठयिल्लो कोयर साळगांव आनी काकोडें प्रकल्पांत व्हरून थंय ताचेर प्रक्रिया करपाचो निर्णय सरकारान घेतला, बुधवारा हाचेर ठोस निर्णय जातलो, अशी म्हायतीय मेळ्ळ्या.
सोनसडो यार्डांत 10 हजार मेट्रीक टन कोयर
सोनसडो कोयर यार्डांत फाटल्या एक वर्सां पसून 10 हजार मेट्रीक टन कोयर सांठयिल्ल्याची म्हायती सादर केली. तशेंच सद्दां 35 मेट्रीक टन कोयर तयार जाता. तातूंतलो 20 मेट्रीक टन कोयर साळगांव प्रकल्पांत जाल्यार 5 मेट्रीक टन कोयर एसजीपीडींत धाडटात, अशी म्हायती सादर केली. तशेंच सद्दां 10 मेट्रीक टन कोयर अतिरिक्त जाता, अशी म्हायती दिली.
मजगतीं, सुनावणे वेळार अॅडव्होकेट जनरल देविदास पांगम हांणी हाचेर उपाय काडपा खातीर मंगळारा बसका घेवपाची हमी खंडपिठांत दिली. ते प्रमाण खंडपिठान फुडली सुनावणी बुधवारा दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
