भांगरभूंय | प्रतिनिधी
वर्साक 6,700 टन सारें, 27 हजार टन आरडीएफ
भांगरभूंय I प्रतिनिधी
पणजी : साळगांव कोयर प्रकल्पांतल्यान वीज तयार करपा सयत सारें लेगीत समाधानकारक प्रमाणांत तयार जाता. हो प्रकल्प लावकारी थारता, अशें वीज, सारें आनी आरडीएफचें प्रमाण पळयल्यार जाणवता. साळगांव कोयर प्रकल्पांतल्यान वर्साक 438 मेगावॅट विजेच्या निर्मिती सयत 6,716 टन सारें आनी 27 हजार टन रेड्यूस डिवायस फ्युयल (आरडीएफ) तयार जाता. कोयर वेवस्थापन म्हामंडळाचे वेवस्थापकी संचालक लेविन्सन मार्टीन हांणी ही म्हायती दिली.
साळगांव कोयर प्रकल्पांत दिसाक 230 टन कोयराचेर प्रक्रिया जाता. हातूंत कांय सुको कोयर आनी कांय प्रमाणांत ओल्या कोयराचो आस्पाव आसता. प्रकल्पाची तांक दिसाक 250 टन कोयराचेर प्रक्रिया करपाची आसा. तशेंच तांकीच्या 20 टक्के परस चड कोयराचेर प्रक्रिया करप शक्य आसा. उत्तर गोंयांतल्या 25 पंचायतींचो कोयर प्रकल्पाक मेळटा. तशेंच पणजी म्हापालिका आनी दक्षीण गोंयांतल्या कांय पंचायतीचो कोयर येता. जितलो कोयर येता, तितल्या कोयराचेर प्रक्रिया जाता. कोयर प्रक्रियेंतल्यान वीज, सारें आनी आरडीएफ (रेड्युस डिवायस फ्युयल) तयार जाता, अशें लेविन्सन मार्टीन हांणी सांगलें.
दिसाक 1.2 मेगावॅट वीज तयार जाता. वर्साचो हिशेब केलो जाल्यार 438 मेगावॅट वीज साळगांव कोयर प्रकल्पांत तयार जाता, अशें म्हणपाक हरकत ना. जितलो कोयर आसा ताचे 5 ते 8 टक्क्यां मेरेन सारें तयार जाता. ओल्या कोयराचें प्रमाण चड आसले जाल्यार सारें चड तयार जाता. दिसाक 230 टना प्रमाण हिशेब केलो जाल्यार वर्साक 6,716 टन सारें तयार जाता. ह्या प्रमाणांत बदल जायत आसता. तशेंच प्रकल्प चलोवपी कंपनी आरडीएफ तयार करता. रेड्युस डिवायस फ्युयल म्हणल्यार कपडे, प्लास्टीक अशो वस्तू कोयरा पसून तयार जातात. वीज, सारें आनी आरडीएफ ह्यो तीन गजाली कोयरा पसून तयार जातात.
कोयर प्रकल्पांत जी वीज तयार जाता, तातूंतली 40 टक्के वीज प्रकल्प चलोवपी कंपनी वापरता. हेर 60 टक्के वीज कंपनी ग्रीडांत सोडटा. हाका लागून सरकाराक वर्साक 263 मेगावॅट वीज कोयर प्रकल्पांतल्यान मेळटा.
फुडाराक प्रकल्पांत तंत्रीक बदल जातले. कोयर प्रक्रियेची तांक लेगीत वाडयतलें. हाका लागून सारें तशेंच विजेचें प्रमाण वाडप शक्य आसा. ह्यो सगल्यो गजाली तंत्रज्ञान कशें विकसीत जाता, ताचेर निंबून आसा, अशें लेविन्सन मार्टीन
हांणी सांगलें.
प्रकल्पांत दिसाक 250 टन कोयराचेर प्रक्रिया
साळगांव प्रकल्पांत 2020 मेरेन दिसाक 100 टन कोयराचेर प्रक्रिया जाताली. उपरांत प्रकल्पाची तांक वाडोवन ती 250 टन केली. हाका लागून वीज तयार करप, तशेंच साऱ्याचें प्रमाण वाडलें. 30 मे 2016 दिसा प्रकल्पाचें उक्तावण जाल्लें. प्रकल्प तयार जावन हिंदुस्थान वेस्ट ट्रीटमेंट प्रायव्हेट लिमिटेड कंपनीन प्रकल्प चलोवपाक सुरवात केली. 2017 पसून वीज निर्मितीक सुरवात जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
