भांगरभूंय | प्रतिनिधी
142.74 कोटी निधी जाल्लो मंजूर; सरकारान दिलो 83.07 कोटी
पणजी : केंद्र तशेंच राज्य सरकार शिक्षणा खातीर अर्थसंकल्पांत भरीव निधीची तजवीज करता. निधीक मान्यताय दिता. तरी खूबशे खेपे मंजूर निधी लेगीत मेळना. हें म्हालेखापालाच्या अहवालांतल्यान सिद्ध जालां. गोंयच्या सर्व शिक्षा अभियानाक 2015 ते 2020 ह्या काळांत मंजूर जाल्ल्या निधी मदले फक्त 58 टक्के निधी मेळ्ळा. म्हालेखापाच्या अहवालांत हे गजालीचो उल्लेख आसा.
2015 ते 2020 ह्या काळांत सर्व शिक्षा अभियानाक 142.74 कोटींचो निधी मंजूर जालो. हातूंतलो सरकारान 83.07 कोटी इतलोच निधी दिलो. 59.67 कोटी इतलो निधी मेळ्ळोच ना. हे प्रमाण 42 टक्के जाता. पांच वर्सांत सर्व शिक्षा अभियानाक 58 टक्केच निधी मेळ्ळा. 42 टक्के निधी मेळूंक ना. तरी लेगीत सर्व शिक्षा अभियाना कडेन पयलींचो शिल्लक निधी आशिल्लो. हाका लागून थोडे चड पयशे खर्च करपाक मेळ्ळे.
2015 ते 2020 ह्या काळांत सर्व शिक्षा अभियाना कडेन 87.80 कोटी निधी उपलब्ध आशिल्लो. हातूंतलो गोंयच्या सर्व शिक्षा अभियानान 87.54 कोटी रुपयांचो निधी खर्च केलो. सर्व शिक्षा अभियाना कडेन उपलब्ध जाल्ल्या निधी मदले 99.70 टक्के निधी खर्च केला. सरकाराची बरीच खातीं अशीं आसात जांकां निधी खर्च करपाक अपेस येता. तरेकवार आडखळींक लागून बरोच निधी वापर नासतना उरता. सर्व शिक्षा अभियान मात हाका अाडवाद थारलां. अभियानान 99 टकक्यां परस चड निधीचो विनियोग केला.
हाका लागून सर्व शिक्षा अभियानाक 2015 – 16 वर्सा युनिफॉर्माचो भत्तो दिवप शक्य जालें ना. तशेच रॅम्प, व्हरांड्याची दुरुस्ती तशेंच शौचालयांची कामां करप शक्य जालें ना. म्हालेखापालांनी हो उल्लेख केला.
सर्व शिक्षा अभियानाक केंद्र तशेंच राज्य सरकारा कडल्यान निधी मेळटा.
सर्व शिक्षा अभियानान निधीचो विनियोग बरे प्रमाणांत केल्लो आसलो तरी तांणी कामाचो आराखडो तयार केलो ना.
4 विद्यालयांच्यो इमारती असुरक्षीत
2018 – 19 ह्या वर्सा उत्तर गोंयांतल्यो 3 जाल्यार दक्षीण गोंयांतल्या एका विद्यालयाची इमारत मोडिल्ले स्थितींत आशिल्ली. ह्या इमारतींचे दुरुस्ती कडेन लक्ष दिलें ना. ह्या तिनूय विद्यालयांनी मेळून 729 विद्यार्थी शिकताले.
सर्व शिक्षा अभियानाक मेळिल्लो निधी (कोटींत)
वर्स मंजूर निधी शिल्लक निधी उपलब्ध निधी खर्च
2015 – 16 24.24 2.09 15.98 16.64
2016 – 17 29.04 0.13 19.63 17.43
2017 – 18 32.28 2.77 17.52 14.71
2018 -19 26.53 1.50 20.13 15.98
2019 – 20 30.65 4.16 23.10 22.78
वट्ट 142.74 10.65 96.36 87.54
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.