भांगरभूंय | प्रतिनिधी
भांगरभूंय प्रतिनिधी
मुरगांवः सडा हांगच्या आंतरराष्ट्रीय दर्जाच्या जलतरण तलावाचें गोंय घटक राज्य दिसा लोकार्पण करतले अशी म्हायती खेळां मंत्री गोविंद गावडे हांणी दिली. मुरगांव तालुक्यांतल्या गोंय खेळां प्राधिकरणाच्या इनडोर स्टेडियम आनी मैदानाची पळोवणी केल्या उपरांत ते पत्रकारां कडेन उलयताले.
मंगळारा (17 मे) गावडे हांणी दाबोळी- चिखली हागचे नूतनीकरण केल्लें क्रिकेट मैदान, आंतरराष्ट्रीय दर्जाचें स्क्वॉश कोर्ट, व्हॉलिबॉल मैदान, व्यायमशाळा हांची पळोवणी केली. सगलीं कामां निमण्या पांवड्यार आयल्यांत. फुडल्या वर्सा जावपी खेलो इंडिया खेलो सर्तीं खातीर राज्यांतल्या सगल्या मैदानांर बऱ्यो सुविधा मेळोवन दिवपाक सरकारान आतां सावन तयारी सुरू केल्या अशी म्हायती तांणी दिली.
गावडे हांच्या वांगडा दाबोळीचे आमदार आनी पंचायत मंत्री माविन गुदिन्हो, वास्कोचो आमदार दाजी साळकार, मुरगांवचो नगराध्यक्ष दामोदर कासकार, उपनगराध्यक्ष अमय चोपडेकार, नगरसेवक प्रजय मयेकार, वास्को रवींद्र भवनाचो अध्यक्ष जयंत जाथव, डॉ निखिल परुळेकार, दक्षीण गोंय खेळां प्राधिकरणाचो कार्यकारी अभियंतो दीपक लोटलीकार, जेनिफर गोन्साल्वीस पालवी संचालक राजेश नायक आनी हेर अधिकारी आशिल्ले.
गावडे हांणी भतेभाट हांगचे बॅडमिंटन इनडोर स्टेडियमाची पळोवणी केली. पावसा पयलीं ताच्या पयल्या टप्प्याचें काम हातांत घेवपाक तांणी सांगलें. सडा हांगच्या जलतरण तलावाची उबारणी गोंय साधन सुविधा उदरगत म्हामंडळान केल्या. सगले सोपस्कार करून तो खेळां प्राधिकरणाचे सुवादीन करतले. 30 मेक गोंय घटक राज्य दिसा ताचें उक्तावण करतलें. हो तलाव विद्यार्थ्यी आनी हेरांक सराव करपाक दितले अशें गावडे हांणी सांगलें. वास्को टिळक फुटबॉल मैदानाचीय गावडे हांणी पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
