भांगरभूंय | प्रतिनिधी
चार वर्सां उपरांत परतून एकदा आशिया करंड क्रिकेट सर्तीचें आयोजन जाता. आयच्यान उक्तावणाची मॅच श्रीलंका आनी अफगाणिस्तान ह्या पंगडां मदीं जातली. फायनल 11 सप्टेंबराक जातली.
पयले मॅची खातीर श्रीलंका आनी अफगाणिस्तान सज्ज आसात. मॅच दुबय क्रिकेट स्टेडियमाचेर जातली. श्रीलंके अंदूं एकूय टी-20 मॅच जिखपाक जमूंक ना, जाल्यार अफगाणिस्तानाक हालींच आयर्लेण्डा आडची पांच मॅचींची टी-20 वगडायल्या. ताका लागून दोनूय पंगड आशिया करंड सर्तींतली पयली मॅच जिखपाक इत्सूक आसतले.
दुबय क्रिकेट स्टेडियमाची खेळपट्टी बॅट्समन आनी बॉलर दोगांकूय मजत करपाक शकता. खेळपट्टी चड स्लो उरपाक शकता, ताका लागून ताचो फायदो स्पिनरांक जावपाक शकता. ह्या मैदानाचेर सरासरी स्कोर 140 आसा.
आशिया करंड क्रिकेट सर्तीची सुरवात 1984त जाल्ली. पयली सर्त संयुक्त अरब अमिरातांत जाल्ली. उक्तावणाची सर्त भारतान जिखिल्ली. ते उपरांत आतां मेरेन 14 खेपे सर्तीचें आयोजन जालां. सात खेपे भारतान वस्तादपण जोडलां. जाल्यार श्रीलंका पंगड पांच खेपे जिखला.
तशेंच पळोवपाक गेल्यार आशिया करंड क्रिकेट सर्त ही वन डे पद्दतीन खेळयतात. पूण, टी-20 प्रकार सुरू जाल्या उपरांत 2016त पयले खेपे आशिया करंड सर्त टी-20 पद्दतीन खेळयिल्ली. 2016त संवसारीक टी-20 सर्त आशिल्ल्यान आशिया सर्त टी-20 पद्दतीन आयोजीत केल्ली. अंदूं लेगीत संवसारीक टी-20 सर्त जावपाची आसा. ताका लागून आयोजकांनी आशिया सर्त लेगीत टी-20 पद्दतीन खेळपाचें थारायलें.
श्रीलंकेचो आदलो अश्टतासांचो खेळगडो सनथ जयसुर्या आशिया करंड सर्तींतलो सगल्यांत येसस्वी खेळगडो आसा. ताणें 25 मॅचींनी खेळटना 1220 धांवड्यो केल्यात. तशेंच श्रीलंकेचो आदलो फास्ट बॉलर लसिथ मलिंगान 14 मॅचींनी 20.55चे सरासरीन वट्ट 29 विकेटी घेतल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
