भांगरभूंय | प्रतिनिधी
पणजी : पोरणें गोंयच्या शेतकी म्हाविद्यालयांत आतां अन्न प्रक्रिया उद्देगाचे प्रशिक्षण दिवपाची कार्यावळ सुरू जातली. म्हाविद्यालयांत जागो तशेंच उपकरणांची वेवस्था जाल्या. शेतकी मंत्री रवी नायक हांचे हस्तुकीं उक्तावण जाले उपरांत प्रशिक्षण दिवपाची कार्यावळ सुरू जातली अशी म्हायती शेतकी म्हाविद्यालयाचे प्राचार्य डॉ. सुरेश कुंकळ्येंकार हांणी दिली.
पोरणें गोंया शेतकी म्हाविद्यालयाच्या इमारतीच्या विस्ताराचो वावर सुरू आसा. अभ्यासक्रमा सयत शेतीचेर आधारीत व्हड प्रमाणांत संशोधनाचे उपक्रम म्हाविद्यालय राबोवपाचें आसा. अन्न प्रक्रिया उद्देग प्रशिक्षण हो हे पैकीं एक आसा, अशें प्राचार्य डॉ. सुरेश कुंकळ्येंकार हांणी सांगलें.
अन्न प्रक्रिया उद्देगा खातीर गरजेचीं तीं यंत्रां, ड्रायर, मिक्सर तशेंच हेर तंत्रज्ञान उपलब्ध आसा. वट्ट 30 लाख रुपया खर्च यंत्रा आनी तंत्रज्ञानाचेर जाला. शेतकी मंत्री रवी नायक हांचे हस्तुकीं केंद्राचें उक्तावण जातलें. उक्तावणाची तारीख अजून निश्चीत जावंक ना, अशें डॉ. कुंकळ्येंकार हांणी सांगलें.
गो वन प्रकल्पा खाला पाळी आनी कुडचड्यार अन्न प्रक्रिया केंद्रां सुरू जाल्यांत. गोंयांत पणस, आंबे, कोकम, काजू, अणसा हांचे उत्पादन व्हड प्रमाणांत जाता. पणसाचे तळिल्ले घरे, धोणस, साठां, केक, पापड तशेंच हेर पदार्थ बरेच बागायतदार करतात. कोकम सोलांक खूब मागणी आसा. कोकम सोलां सावन कोकम सरबत तशेंच सोलकडी करतात. अणसा सावन जॅम करपाची परंपरा पोरणी आसा. आंब्याचीं साठां जातात तशेंच लोणचे लेगीत करतात. ह्या सगल्या पदार्थां खातीर तंत्रज्ञानाचो वापर कशे तरेन करचो, हाचें प्रशिक्षण दितलें. तशेंच पणस, आंबे, काजू सावन नवे पदार्थ करपाक लेगीत वाव आसा. ह्या पदार्थांचे प्रशिक्षण दितले. साठां, लोणचें, जॅम हाचे खातीर उत्पादनाचो खर्च कशे तरेन उणो करप शक्य आसा, हाचेर भर आसतलो.
आपमजत गट तशेंच शेतकारांक तरेकवार पंगडांनी प्रशिक्षण दितले. हाचे खातीर नोंदणी करची पडटली. केंद्राचें उक्तावण जाले उपरांत प्रशिक्षण शुल्क तशेंच हेर गजाली निश्चीत जातल्यो. ह्या प्रशिक्षण केंद्राक लागून उन्न प्रक्रिया उद्देगाचे स्वरूप बदलपाची खर शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
