भांगरभूंय | प्रतिनिधी
वाहन नोंदणेंत वाड, 8 वर्सांतलो उच्चांकी कर
पणजी : येरादारी खात्याक वाहन नोंदणीच्या माध्यमांतल्यान पोरूं वट्ट 414.77 कोटी रुपयांचो कर मेळ्ळा. फाटल्या आठ वर्सांतलो हो उच्चांकी कर थारला. 2021-22 चे तुळेंत पोरूं 131.35 कोटी रुपया खात्याक चड मेळ्ळ्यांत. वाहन नोंदणीचो आंकडो मोट्या प्रमाणाचेर वाडिल्ल्यान करांत वाड जाल्ल्याची म्हायती येरादारी संचालक राजन सातार्डेकार हांणी आमच्या प्रतिनिधी कडेन उलयतना दिली.
येरादारी खात्यान वाहन नोंदणीच्या करांत कसल्याच प्रकाराची वाड करूंक ना. कोवीड काळांत कांय म्हयने राज्यांत ‘लॉकडावन’ आशिल्ले. ताका लागून 2020-21 आनी 2021-22 ह्या दोन वर्सांत वाहन खरेदी खूब उण्या प्रमाणांत जाली. दोन वर्सांत मेळून येरादारी खात्या कडेन 94,975 वाहनांची नोंदणी जाल्ली आनी तातूंतल्यान वट्ट 516.74 कोटी रुपयांचो कर मेळिल्लो. पूण कोवीड काळ सोंपले उपरांत नागरिकांनी वाहन खरेेदी वाडली. ते खातीर 2021-22 चे तुळेंत 2022-23 त 25,472 चड वाहनांची येरादारी खात्या कडेन नोंदणी जाली. तशेंच महसुलांत 131.35 कोटी रुपयांची भर पडली, अशी म्हायती संचालक राजन सातार्डेकार हांणी दिली.
मजगतीं, वाहन नोंदणी करतना धनयांक मोटार वाहन कायद्या प्रमाण अधिसुचीत केल्ले, प्रवासी येरादारी, साधनसुविधा, म्हालाची येरादारी ह्या सारकें जायते कर खात्याक भरचे पडटात. तातूंतल्यान सरकाराचे तिजोरेंत दर वर्सां कोट्यांनी रुपयांचो महसूल जमा जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
