भांगरभूंय | प्रतिनिधी
मुरगांव पालिकेन बंदी घाल्ल्या प्लास्टिकाचो विक्रेत्यांनी केलो वापर
वास्को: सप्ताचे फेरींत विक्रेत्यांनी बंदी घाल्ल्या प्लास्टिकाचो वापर केल्ल्यान मुरगांव पालिकेची वास्को सप्ता प्लास्टीक मुक्त घोशणा म्हणल्यार हांशें थारलें. हांगासरल्या सेंट जोजेफ वाझ मार्गार दुकानां काडले उपरांत रस्त्यार अजुनूय पडून आशिल्लो प्लास्टीक कोयर पळोवन वास्कोकार वेगळ्योवेगळ्यो प्रतिक्रिया उक्तायतात. नितळ शार अशी घोशणा दिवपी मुरगांव पालिकेन निदान स्वातंत्र्य दिसा तरी रस्ते नितळ उरतले हाचे कडेन लक्ष दिवपाची गरज आशिल्ली. पूण एके वटेन मुरगांव पालिका स्वातंत्र्य दीस मनयता आसतना नितळसाणे विशीं आवाहन करीत आशिल्ली. जाल्यार मुखा वयल्या रस्त्या वयल्यो कोयराच्यो राशी नितळसाणेच्यो दर्शन घडयताल्यो अशें चित्र वास्कोकारांक पळोवंक मेळ्ळें.
अंदूंचो सप्ता प्लास्टीक मुक्त करतले अशी घोशणा पालिकेन केल्ली. जे विक्रेते बंदी घाल्ल्या प्लास्टिकाचो वापर करतले तांचे आड खर कारवाय करतले अशी शिटकावणी पालिकेन दिल्ली. पूण विक्रेत्यांनी तांचे शिटकावणी कडेन सदचे प्रमाण आडनदर केली. ह्या वेळार ज्या विक्रेत्यांनी प्लास्टिकाचो वापर केला त्या विक्रेत्यां आड कारवाय जाली काय ना हें मात उक्तें जाल्लें ना.
प्लास्टीक मुक्त वास्को सप्ता अशी जी घोशणा संबंदितांनी दिल्ली ती फक्त प्रसिद्धी खातीर आशिल्ली हें रस्त्यार पडिल्ल्या प्लास्टीक कोयरान उक्ताडार हाडलें. खरें म्हणल्यार फेरयेंतल्या विक्रेत्यांनी 9 ऑगस्टाक रातीं आपलीं दुकानां काडून रस्ते मेकळे करपाची गरज आशिल्ली. पूण कोणाच्या तरी आशिर्वादान खूबशीं दुकानां 13 आनी 14 ऑगस्ट मेरेन आशिल्लीं. ह्या प्रकरणांत कांय जाणांनी आवाज काडले उपरांत पालिकेन त्या विक्रेत्यां मदल्या खूबशा जाणांक दुकानां काडपाक लायलीं. पूण कांय जाणांनी आपलें पाखें काडिल्लें आसलें तरी अजून फुटपाथारूच वेवसाय सुरू केल्ल्याचें चित्र पळोवंक मेळ्ळें.
जांणी आपलीं दुकानां काडलीं थंय प्लास्टिकाचो कोयर व्हड प्रमाणांत एकठांय जाल्ल्याचो पळोवंक मेळटा. ह्या कोयरां मदलो खूबसो कोयर मुरगांव पालिकेच्या नितळसाण कागमारांनी आयतार हो सुटयेचो दीस आसून लेगीत काडिल्लाे. तरी लेगीत सोमारा (15 ऑगस्ट) सेंट जोसेफ वाझ मार्ग आनी भितरल्या रस्त्यांचेर कांय सुवातींनी कोयराच्यो राशी पळोवंक मेळ्ळ्यो.
कांय जाण अजून फुटपाथार तळ ठोकून आसात. दनपार आनी सांजवेळच्या वेळार ते आपलो वेवसाय करतात. त्या वेळार थंय सवाय भितर म्हाल खरेदी करपा खातीर लोकांची एकूच गर्दी जाता. आमचो वेवसाय जावंक ना अशें सांगून ह्या विक्रेत्यांनी सदचे प्रमाण बेकायदो मुजतवाड घेवन व्हड प्रमाणांत वेवसाय केला. ह्या बेकायादो मुजतवाडीक लागून कांय एजंटांचींय बोल्सां गरम जाल्ल्याचें आनी ते एजंट कोणा खातीर काम करतात हे विशींची चर्चा आयकूंक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
