भांगरभूंय | प्रतिनिधी
वाचपाचें म्हत्व सगल्या जाणांक खबर आसा, पूण पुस्तक वाचले उपरांत तांकां वाज येता. मागीर न्हीद. केन्ना- केन्ना उमेदीन वाचपाक सुरवात केली तरी थोडीं पानां वाचले उपरांत पुस्तकाचो विशय वा लेखकाची शैली आवडना. मागीर वाज येता. कांय वेळार हेरांनी सांगिल्ल्यान तें एक पुस्तक वाचता आनी मागीर ल्हवू ल्हवू पुस्तक वाचपाचें सोडून दितात.
भुरग्यां मदीं वाचपाची संवय रुजोवपा खातीर तांकां ल्हान पिराये सावन पुस्तकांचो सांगत दिवप गरजेचें. म्हजे आवयन म्हाका ल्हानपणा सावन लायब्ररीची वळख करून दिली. तिका लागून वाचपाचो मोग म्हज्या काळजांत सामके ल्हान पिराये सावन किल्लून आयलो. तेन्ना म्हाका जादू, राक्षसा विशींच्या पुस्तकांची खूब आवड आशिल्ली. ती दर दिसा बाजारांत वता तेन्ना सदांच म्हजे खातीर पुस्तकां हाडटाली. आजुनूय ती म्हाका लागून बुकां हाडटा. भुरगेपणांत एक संवय आशिल्ली. जेवतना, पुस्तकांत अर्दो दोळो! पुस्तकांत तकली पुरल्या जाल्यार आवयचो उलो केन्नाच आयकूंक येवचो ना. भुरगेपणा सावन म्हाका वाचपाची खूब आवड. इतली की कागदाचो एक कुडको लेगीत वाचनासतना केन्नाच उडयना. वाचनान म्हाका संतोष मेळटा… समाधान मेळटा… वाचनांतल्यान मनांत विचार करपाची शक्त वाडटा.
अधाशा सारकी खंयचीय गजाल वाचपी मनीस म्हळ्यार सामान्य वाचक. आनी हांव स्वताक एक सामान्य वाचक मानतां. म्हाका शब्दकोश, निर्देशिका, कॉमिक बुक, पंचांग, कॅलेंडर, आदले पेपर, जंक दिसाळीं, स्ट्रीट बोर्ड आनी सचित्र पुस्तकां वाचपाक आवडटा.म्हाका सगळें वाचपाक आवडटा. खबरांपत्रांतल्यो ल्हान- ल्हान जायराती वाचपाकय खूब आवडटा. रेसिपी पुस्तकां, लेख, चर्चा वाचपाक आवडटा. पूण मन उदास जातकच हटकून गो. नी. दांडेकर, माडगुळकर, सुधा मूर्ती, वि. स. खांडेकर, सुमति क्षेत्रमाडे आनी पोरण्यो काळांतल्यो बाळबोध वळण दिवपी कथा वाचपाकूय आवडटात.
एक ‘वाचन डायरी’ तयार करात, जातूंत तुमी वाचतात त्या पुस्तकाचें नांव, लेखकाचें नांव आनी तुमकां आवडपी गजाली बरयात. फुडें वाचपाक जाय आशिल्ल्या पुस्तकांची वळेरी तयार करात. भायर सरतना सदांच पुस्तक आपले वांगडा व्हरचें. तुमच्या थळाव्या वाचनालयांत, पुस्तकां दुकानांनी वचात. तुमकां आवडटात तीं पुस्तकां कशीं वेंचचीं आनी नव्यान वाचपाक कशी सुरवात करची, हाचो विचार केल्यार जायते मुद्दे येतात. नव्या गजालींची संवय जावपाक सराव जाय पडटा. जशे आमी जिमांत हलक्या वजनांतल्यान व्यायाम सुरू करतात आनी मागीर तें वाडयत वतात, तशें सादीं सादीं पुस्तकां घेवन वाचपाक सुरवात करात. तुमकां वाचपाक जाय आशिल्ल्या पुस्तकां विशीं फावो ती म्हायती मेळोवची. वाचपाक पुस्तक घेवन वचचें. वाचपाक अमूकच वेळ थारावचो. दर दिसा उण्यांत उणें अर्द वर वाचपाक बसप. वाचपाक बसपाक शांत आनी सोयीस्कर सुवात आसल्यार वाचतना वेगळीच खोस मेळटा.
घरांतल्या पुस्तकांच्या शेल्फाच्या सकयल्या विभागांत वाचपाक मेळपी कांय पुस्तकां दवरात. जाका लागून भुरग्यांक जाय तेन्ना पुस्तकांच्या सांगातांत रावपाक मेळटलें. हाका लागून भुरग्यांक पुस्तकांचो मोग जावं येता. घरांतल्यान भुरग्यां भितर वाचपाची संस्कृताय रुजवपाक जाय, शारांतली बदलिल्ली जीण, पालकांक कामाक वचपाचो वेळ, तशेंच चडशे कुटुंबांनी नाशिल्ले आजो- आजी.. देखून भुरग्यांक घरांत गजाली सांगपाक जाण्टे लोक नात. हाका लागून वाचन संस्कृताय घरांतल्यान ना जावपाक लागल्या. भुरग्यांक वाचपाची आवड निर्माण करपाचे यत्न करचे पडटले. भास आनी साहित्यांत तांकां रूची येवची म्हूण शाळांनी मनोरंजक रितीन शिकोवचें पडटलें. हाका लागूनय व्हड फरक पडूं येता.
आयच्या काळांत कादंबरी आनी कथा वाचप म्हणल्यार कितें तें विद्यार्थ्यांक कळना. भुरगीं अभ्यासक्रमांत चड गुंततात. फेसबूक, टीव्ही, सोशल मिडियाचो वापर हिस्पा भायर वाडला. चडशे विद्यार्थी मनोरंजनाचे व्हिडियो, पदां पळयतात. देखून वाचपा कडेन पुरायपणान दुर्लक्ष जावपाक लागलां. आयच्या पालकांक आपल्या विद्यार्थी भुरग्यांचो फुडार घडोवपाचो आसत जाल्यार तांणी आपल्या भुरग्यांनी वाचपाचो मोग रुजोवचो हे खातीर यत्न करचे. दिसपट्ट्या अभ्यासा भायर वेगवेगळीं पुस्तकां वाचूंक दिवचीं. संवसारांत कितें चल्लां तें समजून घेवपा खातीर सध्याचे पेपर, नेमाळीं वाचात. दिसाळ्यांतल्यो एकान एक बातम्यो वाचपाक जाय अशें ना. निदान भुरग्यांनी दिसपट्टे माथाळे वाचपाक जाय अशे म्हाका दिसता.
गौरी भालचंद्र
9422373926
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
