भांगरभूंय | प्रतिनिधी
भोमाच्या लोकांचो निश्चेवः बायपास रस्त्या संबंदांत जाहीर सभेंत निर्णय, लडो खर करपाची शिटकावणी
भांगरभूंय । प्रतिनिधी
फोंडें: भोमाचे लोक बायपास रस्त्याची मागणी करतात, पूण गोंय सरकार मात लोकांचो विरोध फाफडून रस्त्याचें काम सुरू करपाच्या यत्नांत आसा. गोंयांतल्या खूबशा बिगर सरकारी संस्थांनी दिल्ल्या तेंक्याक लागून भोमाच्या लोकांची हिंमत वाडल्या. सरकाराक ताची सुवात दाखोवपाक भोमाचे लोक सक्षम आसात. येता ते लोकसभा वेंचणुकेंत सरकारा वांगडा रावचे नात, असो निश्चेव आयतारा जाल्ले जाहीर सभेंत भोमाच्या लोकांनी केलो. तशेंच हो लडो आनीक खर करपाची शिटकावणी तांणी सरकाराक दिली.
भोमाच्या सांतेरी देवळाच्या प्राकारांत आयतारा आयोजीत केल्ले जाहीर सभेक आमदार विरेश बोरकार, नाट्य कलाकार राजदीप नायक, उपसरपंच शैला नायक, पंच सुनील भोमकार, लोक कलाकार कांता गावडे, शंकर पोळजी, रामा काणकोणकार, अँथोनी डिसिल्वा, झरिना डिकुन्हा, विश्वेश नायक, संजय नायक आनी हेर मानेस्त हाजीर आशिल्ले.
आमदार विरेश बोरकार हांणी सांगलें, भाजपा सरकारान लोकांची दिशाभूल करपाचें कारस्थान रचलां. भोमाच्या लोकांक बेघर करून उदरगतीच्या कामाक चालना दितना लोकांचो विरोध कुस्कुटा समान लेखतात. हिंदुत्वाची भास करपी सरकार भोम गांवांतल्या देवळांत धोको निर्माण करपाचो यत्न करता. सरकाराची हुकूमशाय वाडटा. लोकांनी सादूर रावपाची गरज आसा. फोंडें म्हालांतले 4 मंत्री लेगीत भोमाच्या लोकांचे मागणे कडेन आडनदर करतात. ताका लागून लोकांनी संघटीत रावून लडो अदीक खर करपाची गरज आसा, अशें तांणी सांगलें.
शंकर पोळजी हांणी सांगलें, कॅसिनो आनी कोळसो लॉबी केल्लो सरकार लोकांच्या प्रस्नां कडेन गांभिर्यान पळयना. सैमाचें लुकसाण करून विवीध प्रकल्प चालीक लायता. गोंयचें अस्तित्व तिगोवन दवरचे खातीर सरकारा आड लडो दिवप काळाची गरज जाल्या.
झरिना डिकुन्हा हांणी सांगलें, माकड उडयो मारपी राजकारण्यांचेर लोकांनी विस्वास दवरचो न्हय. गोंयचे मंत्री कर्नाटकांत वचून थंयच्या लोकां खातीर लडटात, पूण गोंयकारांचे प्रस्न सोडोवपा खातीर यत्न करिनात. फक्त सुवार्थाचें राजकारण करपाक मंत्री प्राधान्य दितात.
भोमाचे लोक हक्का खातीर लडटात. गोंयचे राजकारणी चंद्राचेर लेगीत जमीन सहज खरेदी करपाक शकतात. भोमाच्या लोकांनी येता ते लोकसभा वेंचणुकेंत ठोस निर्णय गेवन सरकाराक सुवात दाखोवपाक तयार रावचे, असो उलो राजदीप नायक हांणी मारलो. उत्तर गोंयचे खासदार तशेंच केंद्रीय मंत्री श्रीपाद नायक हांणी भोमाच्या लोकांचो प्रस्न गांभिर्यान घेवन केंद्रांतल्या फुडाऱ्यां मेरेन विशय मांडपाक व्हड योगदान दिलां. पूण तांणी हे मुखार आपूण पक्षा वांगडा रावतलों, अशें सांगिल्ल्यान भोमाच्या लोकांची निर्शेवणी जाल्या. ते खातीर फुडल्या वर्सा जावपा आशिल्ले लोकसभा वेंचणुकेंत लोकांनी सरकारा वांगडा रावचे न्हय, असो निश्चेव केला, अशें भोमाचे संजय नायक हांणी सांगलें.
उदरगत करची, पूण त्रास दिवन न्हयः कांता गावडे
भोमाचे लोक बायपास रस्त्याची मागणी करतात. थळाव्या लोकांक त्रास करून उदरगत करची न्हय. लोक प्रतिनिधींनी थळाव्या लोकांच्या प्रस्नाचेर उपाय काडपाची गरज आसा. पूण लोकशायेंत लोकांक न्याय मेळोवपा खातीर रस्त्याचेर देंवचें पडटा, हें गोंयकारांचें दुदर्दैव आसा, अशें कांता गावडे हांणी सांगलें.
भोमाच्या लोकांनी ठोस निर्णय घेवचोः विरेश बोरकार
भाजपा सरकार दिश्टीहिनाची भुमिका घेता. फक्त गोंयकारांचींच घरां मोडपाचेर लक्ष दिता. थळाव्या लोकांक बेघर करून बिगर गोंयकारांक थाकाय दिवपांत सरकार व्यस्त आसा. सरकाराक जागो करचे खातीर भोमाच्या लोकांनी ठोस निर्णय घेवपाची गरज आसा, अशें आमदार विरेश बोरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
