लिंगीक अत्याचार प्रकरणांतल्या पुलिसाची रोखडीच चवकशी

भांगरभूंय | प्रतिनिधी

विद्यापीठ निबंधकाच्या आदेशा उपरांत अंतर्गत समिती वावराक

भांगरभूंय । प्रतिनिधी

पणजीः गोंय विद्यापिठांतल्या दोन विद्यार्थिनींचेर पुलीस अधिकाऱ्यान पुलीस विभागांत अत्याचार केल्ल्याच्या प्रकरणाची रोखडीच चवकशी करून अहवाल दिवपाचे आदेश विद्यापिठाच्या निबंधकान दिल्या. ते उपरांत अंतर्गत समितीन चवकशेक गती दिल्या. संबंदीत अधिकाऱ्यांची समिती रोखडीच सुनावणी घेतली, अशी म्हायती विद्यापिठांतल्या सुत्रांनी दिल्या.

विद्यापिठांतल्या वाणिज्य फांट्याचे सहाय्यक प्राध्यापकान विद्यार्थिनीची लिंगीक सतावणूक केल्ल्याचें प्रकरण उजवाडांत आयले उपरांत फाटल्या मे म्हयन्यांत एका पुलीस अधिकाऱ्यान प्रशिक्षणा खातीर पुलीस विभागांत गेल्ल्या दोन विद्यार्थिनींचेर थंयच्या पुलीस अधिकाऱ्यानूच लिंगीक अत्याचार केल्ल्याची आनी हें प्रकरण विद्यापिठाचे अंतर्गत समिती कडेन आशिल्ल्याची म्हयती ‘भांगरभूंय’क मेळिल्ली. ‘भांगरभूंय’न हें प्रकरण लावन धरले उपरांत ताळ्यार आयिल्ल्या विद्यापिठाच्या निबंधकांनी ह्या प्रकरणाची बेगिनात बेगीन चवकशी करून अहवाल सादर करपाचे आदेश अंतर्गत समितीक दिल्ले. ते प्रमाण, समितीन दोन दिसां आदीं बसका घेतली. संबंदीत पुलीस अधिकाऱ्याक सुनावणेक आपोवपाचो निर्णय हे बसकेंत घेतला, अशें सुत्रांनी सांगलें. मजगतीं, ह्या प्रकरणांत राज्य महिला आयोग लेगीत आक्रमक जाला. सोमारा विद्यापिठाचे अंतर्गत समितीक पत्र धाडून 15 दिसां भितर अहवाल सादर करपाचे निर्देश दितले, अशें आयोगाची अध्यक्ष रंजिता पै हांणी स्पश्ट केलां.

जापो मेळूंक नाशिल्ले प्रस्न

1. लिंगीक अत्याचाराचें प्रकरण पुलीस विभागांत म्हणल्यार विद्यापीठ वाठाराच्या भायर घडिल्लें. ताची कागाळ विद्यार्थिनींनी केले उपरांत विद्यापिठान ती पुलीस पुलीस खात्या कडेन कित्याक वर्ग करूंक ना?
2. ह्या प्रकरणांतल्या पुलीस अधिकाऱ्याक अंतर्गत समितीन खूब खेपे आपयिल्ले, पूण विवीध कारणां दिवन तो गैरहाजीर रावलो. तरी लेगीत विद्यापीठ वा अंतर्गत समितीन ताका अभय कित्याक दिलें?
3. लिंगीक अत्याचाराचें हें प्रकरण अंतर्गत समिती कडेन पावले उपरांत ताची म्हायती पुलीस खात्याक नाशिल्ली?
4. संबंदीत अधिकाऱ्याक बडटी दितना ह्या प्रकरणाचो मातूय विचार करूंक ना?