भांगरभूंय | प्रतिनिधी
30 सप्टेंबरा मेरेन लिंक करप गरजेचें, नाजाल्यार जातलें रद्द
पणजी : रेशन कार्ड आधार कार्डाक लिंक करपाची मुजत केंद्र सरकारान 30 सप्टेंबर 2023 मेरेन वाडयल्या. हे मुजतींत ही प्रक्रिया पुराय ना करप्यांचीं रेशनकार्डां 30 सप्टेंबरा उपरांत रद्द करतले, अशी निमाणी सुचोवणी राज्य नागरी पुरवण खात्यान मंगळारा दिल्या. खात्याचे संचालक गोपाळ पार्सेकार हांणी हे विशींचें पत्रक जारी केलां.
केंद्र सरकारान कोवीड काळांत नागरिकांक फुकट धान्याची पुरवण केल्ली. हाचे मुखार डिसेंबर 2023 मेरेन फुकट धान्य मेळटलें. पूण सरकाराच्या हे येवजणेचो चुकीचे पद्दतीन कांय जाण लाव घेतात. जायत्या लाबार्थ्यांची दोन रेशनकार्डां आसून, दोनूय रेशनकार्डांनी नांव आशिल्ले जायते लाबार्थी आसात. अशा अपात्र लाबार्थींचेर नियंत्रण दवरपाक केंद्रीय नागरी पुरवण मंत्रालयान 19 मार्च 2020 दिसा आदेश जारी करून, देशभरांतल्या रेशनकार्ड धारकांक आपले रेशनकार्ड आधारकार्डा वांगडा लिंक करपाची सक्ती केल्ली. पूण फाटल्या तीन वर्सांत ही प्रक्रिया करूंक नाशिल्ल्यान केंद्रान परतून मुजतवाड दिल्या. आतां हे प्रक्रियेक 30 सप्टेंबर 2023 मेरेनची मुजतवाड दिल्या. हे मुजतींत गोंयांतल्या रेशनकार्ड धारकांनी अापली रेशनकार्डां आधारकार्डा कडेन लिंक करची. नाजाल्यार 30 सप्टेंबरा उपरांत जी रेशनकार्डां अाधारकार्डां कडेन लिंक नासतली ती रद्द करतले, अशें पार्सेकार हांणी पत्रकांत नमूद केलां.
दाळीच्या सांठ्याची म्हायती दर शुक्रारा दिवची
मजगतीं, गोंयांतल्या दाळ डिलर्स, आयातदार तशेंच सांठवणूक करप्यांनी दर शुक्रारा तांचे कडेन आशिल्ल्या दाळीच्या सांठ्याचो डाटा केंद्रीय गिरायक वेव्हार मंत्रालयाच्या
http://fcainfoweb.nic.in/psp ह्या पोर्टलाचेर अपलोड करचो, अशी सुचोवणी नागरी पुरवण खात्यान केल्या.
रेशनकार्ड अाधारकार्डाक लिंक करपाची प्रक्रिया
-सगल्यांत पयलीं food.wb.gov.in ह्या अधिकृत वेबसायटीक भेट दियात. ते उपरांत आधारकार्ड क्रमांक, शिधापत्रिका क्रमांक आनी नोंदणीकृत मोबायल नंबरची म्हायती भरात. उपरांत
‘continue’ ह्या पर्यायाचेर क्लीक करात.
– हे प्रक्रिये उपरांत नोंदणीकृत मोबायल क्रमांकाचेर ‘ओटीपी’ येतलो. हो ओटीपी दिल्ले चौकटेंत एंटर केले उपरांत रेशनकार्ड आनी आधारकार्ड एकमेकांक लिंक जातलें.
– खंयच्याय कारणाक लागून ऑनलायन पद्दतीन ही प्रक्रिया करपाक असमर्थ आसप्यांक रेशन दुकानदारां कडेन वचून रेशनकार्ड अाधारकार्डां कडेन लिंक करून घेवचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
