भांगरभूंय | प्रतिनिधी
गोविंद गावडेः विजय सरदेसाय हांचो दिशाभूल करपाचो यत्न
पणजीः राष्ट्रीय खेळां सर्तीच्या कामाचो खर्च पारदर्शक आसा. राष्ट्रीय खेळां सर्तीच्या कामांत भानगड जाल्ल्याचो आरोप करतना विजय सरदेसाय जी आंकडेवारी सादर करता ती दिशाभूल करपी आसा. सभाघरांत लेगीत तांणी प्रस्नाचेर प्रस्न विचारून दिशाभूल करपाचो यत्न केलो, अशें खेळां मंत्री गोविंद गावडे हांण सांगलें.
बिरेस्तारा सभाघरांत राष्ट्रीय खेळां सर्तीच्या कामांच्या प्रस्नाचेर चर्चा जाली. ते उपरांत आमदार विजय सरदेसाय हांणी पत्रकार परिशद घेवन राष्ट्रीय खेळां सर्त ही एक भानगड आशिल्ल्याचो आरोप केलो. हाका मंत्री गावडे हांणी पत्रकार परिशद घेवन प्रत्युत्तर दिलें.
राष्ट्रीय खेळां सर्ती खातीर 225 कोटी रुपयांचे निधीची तजवीज आसा. जीं कामां केल्यांत तीं निविदा जारी करून जाल्यांत. काम पुराय जावंक नाशिल्ल्या कारणान कंत्राटदाराक पुराय पयशे फारीक करूंक नात. सगळे वेव्हार पारदर्शक आसतना विजय सरदेसाय हांणी सभाघरांत प्रस्नाचेर प्रस्न विचारले. तांच्या सगळ्या प्रस्नाच्यो जापो मंत्री ह्या नात्यान आपले कडेन आशिल्ल्यो, पूण तांकां त्यो नाका आशिल्ल्यो. सभाघर तशेंच लोकांची दिशाभूल करपाचो तांचो हेतू आसा, अशें मंत्री गावडे हांणी सांगलें.
राष्ट्रीय खेळां सर्ती खातीर पेडें मैदानाची दुरुस्ती जाल्या. ह्या मैदानाची स्थिती बाबत आशिल्ली. हे खातीर त्या मैदानाची दुरुस्ती केली. कांपाल स्विमींग पुलाचो उल्लेख विजय सरदेसाय हांणी केलो. डायव्हींग पुलाची दुरुस्ती जावंक नाशिल्ली. ताचे दुरुस्तीकाम चालू आसा. हे खातीर कंत्राटदाराक पयशे फारीक करूंक ना. नेमां प्रमाण कामां तशेंच खर्च जाला. विजय सरदेसाय हांकां खेळाचें गिन्यान ना. भानगडींतल्या मनशाक सगळ्याक भानगडीच दिसतात, अशी टिका मंत्री गावडे हांणी केली. कांपाल स्विमींग पुलाचेर 12.70 कोटी रुपया जाल्लो खर्च ही भानगड, असो आरोप विजय सरदेसाय हांणी केल्लो. ह्या आरोपाक मंत्री गावडे जाप दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
