भांगरभूंय | प्रतिनिधी
तीन म्हयन्यांत धोरण निश्चीत करपाचें मुख्यमंत्र्यांचें आस्वासन
पर्वरी : गोंयांत वट्ट 699 कावलां अड्डे आसात. तातूंतले 686 बेकायदो आसात. ह्या अड्ड्यांनी स्फोटक, ज्वलनशील रसायनांचे सांठे केल्यात. ताका लागून अशा बेकायदो कावलां अड्ड्यांनी अतिरेकी कारवायो जावपाक शकतात, अशें आसतना जिल्होधिकारी, पंचायती, पालिका ह्या कावलां अड्ड्यांचेर आडनदर करतात, असो आरोप विरोधी पक्षफुडारी युरी आलेमांव हांणी केलो.
आलेमांव हांणी सोमारा अधिवेशनांत प्रस्नोत्तर काळांत बेकायदो आनी असुरक्षीत कावलां अड्ड्यांच्या प्रस्ना वयल्यान महसूल मंत्री बाबूश मोंसेरात हांकां घेरले. हातूंत मुख्यमंत्री डॉ. सावंत हांकां मध्यस्थी करची पडली. तांणी हाचेर जाप दिली. राज्यांतल्या कावलां अड्ड्यां खातीर तीन म्हयन्यांत धोरण निश्चीत जातलें. सध्या भोवतेक बेकायदो कावलां अड्ड्यांक नोटिसो धाडल्यात. धोरण अधिसुचीत जाले उपरांत सगल्याच कावलां अड्ड्याचे संबंदीत म्हालांतल्या उद्देगीक वसणुकांनी जागा निश्चीत करून स्थलांतर करतले, अशी हमी मुख्यमंत्री डॉ. सावंत हांणी सभाघरांत दिली.
भोवतेक कावलां अड्डे कामुनिदाद, गृहनिर्माण वसणूक वा खाजगी जागेंत आसात. सुमार 1.58 लाख चौ. मिटर सुवात कावलां अड्ड्यांनी अाडायल्या. ह्या कावलां अड्ड्यांनी ज्वलनशील रसायनांचो सांठो करतात. ताचेर सरकाराची देखरेख दवरपाक यंत्रणा ना. कावलां अड्ड्यांक लागून संबंदीत वाठारांत व्हड प्रदुशण जाता. ताचो त्रास थळाव्यांक सोंसचो पडटा. सरकार हाचेर कालमर्यादा दवरून कितें उपाय काडटले व्हय? असो प्रस्न युरी हांणी मांडलो. तशेंच हाचेर मंत्री बाबूश हांकां प्रस्नाचेर प्रस्न विचारून घेरले.
अंदूंच्या अर्थसंकल्पांत घनकोयर वेवस्थापन धोरण तयार करपाचें आस्वासन दिल्लें. ताचो मसुदो तयार केला. अशें धोरण तयार करपी गोंय हे देशांतले पयलें राज्य. ह्या धोरणा प्रमाण राज्यांतल्या सगल्याच कावलां अड्ड्यांचे संबंदीत म्हालांतल्या उद्देगीक वसणुकांनी स्थलांतर करतले. पयल्या टप्प्यांत लोकवसणुकेंत आशिल्ले कावलां अड्डे स्थलांतरीत करतले. कावलां अड्डे धनयांक स्वता जागा घेवची पडटली. तशेंच ते खातीर उद्देगीक म्हामंडळा कडेन रितसर अर्ज करचो पडटलो, अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
