भांगरभूंय | प्रतिनिधी
दिसाक सरासरी एका व्यक्तीक जाता कांक्र
पणजी : डायबेटीसप्रमाण गोंयांत कॅन्सर (कांक्र) दुयेंतींनी वाड जायत आसा. 2021 चे तुळेंत 2022 त विवीध प्रकारच्या कांक्राचें 430 नवे दुयेंती सांपडल्यात. 2021 त कांक्राचें 843 दुयेंती आशिल्ले. तातूंत वाड जावन 2022 त 1,273 जाले. म्हणल्यार दिसाक सरासरी एका व्यक्तीक कांक्र जाता, अशें हातूंतल्यान स्पश्ट जाता.
कांक्रा विशीं लेखी प्रस्न आमदार प्रवीण आर्लेकार हांणी विचारिल्लो. तांच्या प्रस्नाक सविस्तर जाप दितना भलायकी मंत्री विश्वजीत राणे हांणी फाटल्या तीन वर्सांत भलायकी खातें आनी गोमॅकाँतल्या कांक्राच्या दुयेंतींचो आंकडो जाहीर केलो.
भलायकी मंत्री विश्वजीत राणे हांणी सादर केल्ल्या आंकडेवारी प्रमाण, भलायकी खातें आनी गोमॅकाँत जे दुयेंती मेळ्ळ्यांत, तातूंत स्तन आनी गर्भाशयाचो कांक्र जावपी दुयेंतींची संख्या वाडल्या. 2020 ते आतां मेरेन स्तनांचो कांक्र आशिल्ले 699, जाल्यार गर्भाशयाचो कांक्र आशिल्ले 135 नवे दुयेंती राज्यांत सांपडल्यात, अशें जापेंत नमूद केलां.
मजगतीं, मुळाव्या पांवड्यार कांक्राचें निदान जावन बेगोबेग दुयेंतींक उपचार मेळचे, हे खातीर भलायकी यंत्रणे कडल्यान शिबिरांच्या माध्यमांतल्यान जागृताय करतात. बायलांच्याेय चांचण्यो करतात, अशेंय भलायकी मंत्री राणे हांणी जापेंत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
