भांगरभूंय | प्रतिनिधी
सरासरी परस 13 टक्के चड पावस
पणजी: गोंयांत आतां मेरेन 64 इंच पावसाची नोंद जाल्या. हातूंत 10 वाठारांनी 60 इंचा परस चड पावसाची नोंद जाल्या, जाल्यार तीन वाठारांनी पावसान अर्दशेंकडो हुपला. सरासरी परस 13 टक्के चड पावस पडला.
अंदूं मॉन्सून उसरां दाखल जालो. ते उपरांतूय वट्ट 10 दीस पावसान कळाव केलो. बिपरजॉय चक्रीवादळाच्या प्रभावान पावस लांबणेर पडिल्लो. पूण 22 जून पसून राज्यभर उटंगाराचो पावस पडलो. ते उपरांत एक-दोन दीस वगळ्ळ्यार नेटाचो पावस पडून इंचाचो अर्दशेंकडो हुपलो. ताका लागून शेतकार आनी लोकां मदीं समाधान पातळिल्लें.
1 जून ते 15 जुलय ह्या काळांत सगल्यांत चड 72 इंच पावसाची नोंद मडगांव आनी केपें ह्या दोन शारांनी जाल्या. ते उपरांत सांगें 71.50 इंच पावस पडलो. म्हापशें, पेडणें, फोंडें, पणजी, काणकोण, दाबोळी अानी मुरगांव ह्या सात शारांनी 60 इंचा परस चड पावस पडला. जाल्यार पोरणें गोंय, सांखळी आनी वाळपय 50 इंचा परस चड पावसाची नोंद जाल्या.
हाचे पयलीं वाळपयंत सगल्यांत चड पावसाची नोंद जाताली. पूण फाटल्या दोन वर्सां पसून वाळपय चड पावसाची नोंद जावंक ना. अंदूंय वाळपय सगल्यांत उणो 55 इंच पावसाची नोंद जाल्या.
आतां मेरेनचो पावस (इंचांत)
म्हापशें : 64
पेडणें : 63
फोंडें : 62
पणजी : 63
पोरणें गोंय : 57.50
सांखळी : 54.50
वाळपय : 55
काणकोण : 66
दाबोळी : 61.50
मडगांव : 72
मुरगांव : 61
केपें : 72
सांगें : 71.50
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
