भांगरभूंय | प्रतिनिधी
विद्या समीक्षा केंद्रा मार्फत विद्यार्थी, शिक्षकांच्या कामगिरीचेर नदर
पणजी, प्रतिनिधी : राज्यांत आता ड्युएल (दोट्टी) पदवी घेवपाची वेवस्था जातली. नव्या राष्ट्रीय शिक्षण धोरणा प्रमाण अंदूं सावन ती सुरू जातली, अशें मुख्यमंत्री डॉ. प्रमोद सावंत हांणी सांगलें.
राज भवन दरबार हॉलांत शिक्षक दिसाची कार्यावळ जाली, त्या वेळार ते उलयताले. राज्यांतल्या ८ शिक्षकांक मुख्यमंत्री वशिश्ठ गुरू पुरस्कारान सन्मानीत केले.
शिक्षणांतल्या मुळाव्या सुविधां मदीं हेर राज्यांचे तुळेंत गोंय राज्य फुडें आसा. राष्ट्रीय पावंड्यार नामना जोडपाची तांक गोंयच्या विद्यार्थ्यां मदीं आसा. हाचे खातीर शिक्षकांक खासा येत्न घेवचे पडटले, अशें मुख्यमंत्र्यांनी सांगलें.
परंपरीक शिक्षणा सयत सरकारान कुशळटाय शिक्षणाचेर भर दिल्या. रोजगार उपलब्ध करपाक अप्रेंटीस येवजण सुरू केल्या. लोकांक दिसता तितली गोंयांत बेकारी ना. काम करपाची इत्सा आसा, त्या सगल्यां खातीर काम आसा. कोडींग आनी रोबोटिक्स अभ्यासक्रम सुरू करपी गोंय हें पयलें राज्य. आतां विद्या समीक्षा केंद्र सुरू जाता. ताचे वरवीं दरेकी विद्यालयांतले शिक्षक आनी विद्यार्थ्यांचेर नदर दवरप शिक्षण खात्याक शक्य जातलें, अशें मुख्यमंत्री सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
