भांगरभूंय | प्रतिनिधी
साडेचार वर्सांत 115 गुन्यांव सायबर विभागांत नोंद
पणजी : राज्यांतल्या सायबर गुन्यांवांनी दरेक वर्सा वाडत जायत चल्ल्या. फाटल्या साडेचार वर्सांच्या काळांत सायबर गुन्यांवांनी राज्यांतल्या 115 जाणांची अर्थीक फटवणूक केल्या, जाल्यार 159 जाणांची विवीध मार्गांनी छळणूक केल्या. आमदार दिगंबर कामत हांणी विधानसभेंत विचारिल्ल्या नकेत्री प्रस्नाच्या जापेंतल्यान मुख्यमंत्री डॉ. प्रमोद सावंत हांणी हे विशींची सविस्तर म्हायती दिल्या. यूपीआयच्या माध्यमांतल्यान फटवणूक केल्ल्याच्यो 115 तशेंच सोशल मिडियाच्या माध्यमांतल्यान छळणूक केल्ल्याच्यो 159 मेळून वट्ट 274 कागाळी फाटल्या साडेचार वर्सांच्या काळांत सायबर गुन्यांव विभागांत नोंद जाल्ल्याचे मुख्यमंत्र्यांनी जापेंत नमूद केलां.
यूपीआय वरवीं बँक खात्यांतले पयशे परस्पर काडपाच्या प्रकरणांत सायबर गुन्यांव विभागांतल्या कागाळींनी मोट्या प्रमाणांत वाड जाल्या. 2019 त अशा प्रकाराच्यो 7 कागाळी आयिल्ल्यो. 2020 त त्यो वाडून 25 जाल्यो. 2021 त त्यो 23 आशिल्ल्यो, पूण 2022 त तातूंत वाड जावन त्यो 43 जाल्यो. जाल्यार 2023 वर्साचे सुरवातीच्या 6 म्हयन्यांत अशा प्रकारांच्याे 17 कागाळी नोंद जाल्ल्याचे मुख्यमंत्री डॉ. सावंत हांणी जापेंत नमूद केलां.
मजगतीं, सायबर गुन्यांवां विशींचीं प्रकरणां राज्यांतल्या हेर पुलीस स्टेशनां हाताळटात. गरज पडल्यार अशी प्रकरणां सायबर गुन्यांव विभागा कडेन वर्ग करतले, अशेंय जापेंत नमूद केलां.
ऑनलायन पद्दतीन 159 जाणांची छळणूक
ऑनलायन पद्दतीन छळणूक करप, धमक्यो दिवप तशेंच सोशल मिडिया हॅक करप अशा प्रकारांच्या कागाळींनी वाड जाल्या. 2019 त 14 कागाळी सायबर गुन्यांव विभागा कडेन आयिल्ल्यो. 2020 त तांची संख्या 32 जाली. 2021 त 27 कागाळी आयिल्ल्यो. पूण 2022 त तातूंत वाड जावन तांचो आंकडो 65 जालो. 2023 वर्साचे सुरवातीच्या 6 म्हयन्यांत अशा प्रकाराच्याे 21 कागाळी दाखल जाल्ल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
