भांगरभूंय | प्रतिनिधी
दुबावीत कोलवाळ बंदखणींतल्यान जामिनार सुटिल्ले
पणजी: मरड म्हापश्यां रिझीम प्लाझा इमारतींतल्या दुसऱ्या मळ्या वयले क्रेडीट सोसाटीच्या फांट्या सयत चार कचेऱ्यांनी चोरी केल्ल्या प्रकरणांत म्हापशें पुलिसांनी तीन खांप्या चोराक अटक केली. पुलिसांनी 24 वरां भितर ह्या प्रकरणाचो सोद लायलो. तिगूय दुबावीत हालींच कोलवाळ बंदखणींतल्यान सुटिल्ले.
रमेश सत्या उर्फ वडार (37, बिजापूर-कर्नाटक), संजय शिवाजी बाने (26, लातूर-महाराष्ट्र) आनी महम्मद शेख (28, गदग-कर्नाटक) अशीं दुबावितांचीं नांवां आसात.
ही चोरयेची घडणूक बिरेस्तारा सकाळीं 9.30 वरांच्या सुमाराक उक्ताडार आयली. इमारतीच्या दुसऱ्या माळ्या वयल्या मिलाग्रीस क्रेडीट सोसायटीचो मुखेल फांटो, अॅड. शंकर चोडणकार, अॅड. विनिषा ब्रागांझा आनी कन्सलटंट बाबल धारगळकार हांचे कचेरेंतल्यान तीन मोबायल आनी सुमार 25 हजार रुपया रोख मेळून सुमार 70 हजारांचो म्हालवज चोरयेक गेल्लो.
तातूंतले पुलिसांनी दुबावितां कडल्यान तीन मोबायल आनी 16 हजार रोख रक्कम जप्त केली. जाल्यार दुबावितांनी उरिल्ले 9 हजार रोख रुपया खर्च केले. ह्या तिगां दुबावीत आरोपींक पयलो वर्ग न्यायालयान पांच दिसांची पुलीस बंदखणीची ख्यास्त दिल्या अशी म्हायती पुलीस निरिक्षक परेश नायक हांणी दिली.
दुबावीत आरोपी हे खांपे गुन्यांवकार आसात. मडगांव आनी कोलवाळ हांगासरल्या वेगळ्यावेगळ्या चोरी प्रकरणाक लागून तिगूय दुबावीत बंदखणींत आशिल्ले. पुलिसांनी बंदखणींत संपर्क सादलो आनी हालींच्या काळांत चोरी प्रकरणांतले जामिनार सुटिल्ल्या दुबावितांची म्हायती मळयली. दुबावीत रमेश सत्या हो एका म्हयन्या पयलीं जामिनाचेर सुटिल्लो. जाल्यार दुबावीत संजय बाने आनी महम्मद शेख हे दोगूय फाटल्या 2 मे दिसा बंदखणींतल्यान सुटिल्ले. ह्या तिगांय दुबावितांचो जामीन रद्द करचो हे खातीर संबंदीत पुलीस स्टेशनाक पुलीस अधिक्षका वतीन पत्र बरयतले अशी म्हायती निरिक्षक नायक हांणी दिली.
सीसीटीव्ही आनी खात्रेच्या गोपांच्या आदाराचेर पुलीस निरिक्षक परेश नायक हांच्या मार्गदर्शना खाला उपनिरिक्षक विभा वळवयकार हवालदार आल्विटो डिमेलो, सुशांत चोपडेंकार, कॉन्स्टेबल राजेश कांदोळकार, प्रकाश पोळेकार, अभिषेक कासार, अक्षय पाटील, लक्ष्मीकांत नायक, आनंद राठोड, वामन पालयेंकार, सुरेंद्र गावस आनी संदेश नागोजी ह्या पंगडान ही कारवाय केली.
चोरी केले उपरांत दुबावीत आरोपी मडगांवां पळून गेल्ले. पुलिसांनी दुबावितांचो मार्ग काडीत तांकां थंय ताब्यांत घेतले आनी म्हापश्यां हाडले. चवकशे वेळार दुबावितांनी चोरयेची कबुली दिली आनी तांचे कडल्यान चोरयेक गेल्ले मोबायल, रोख रक्कम ताब्यांत घेतली.
तिगूय दुबावीत मडगांव रेल्वे स्टेशना कुशीक रावताले. तांची कोलवाळ बंदखणींतूच वळख जावन इश्टागत जाल्ली. म्हापश्यां चोरी करून ते पुण्यां धांव मारपाचे तयारेंत आशिल्ले. म्हापशें सावन ओम ट्रॅव्हल ह्या प्रवासी बशींतल्यान तांणी पुण्या वचपा खातीर तिकेट काडिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
