भांगरभूंय | प्रतिनिधी
सुभाष शिरोडकारः दर वर्सा 100 ते 150 एमएलडी उदक वाडोवपाचें नियोजन
भांगरभूंय । प्रतिनिधी
पणजी : म्हादय न्हंयेचेर 5 धरण प्रकल्पांचें काम जानेवारी मेरेन सुरू जातलें. दर वर्सा 100 ते 150 एमएलडी उदक वाडचें, अशे तरेचें नियोजन आशिल्ल्याची म्हायती उदका पुरवण खात्याचे मंत्री सुभाष शिरोडकार हांणी दिली.
म्हादय न्हंयेचेर 6 धरण प्रकल्प जातले. तातूंतल्या 5 धरणांचें काम जानेवारी 2024 मेरेन सुरू करपाचे यत्न आसात. काजूमळ, तातोडी आनी माणके धरण प्रकल्पाच्या माती परिक्षणाचो वावर पुराय जाला. ह्या धरणांचीं कामां डिसेंबर मेरेन सुरू जातलीं.
2047 मेरेनच्या उदकाची गरज लक्षात घेवन नियोजन करपाची गरज आसा. राज्यांत उदकाचो उणाव ना. पावस खूब पडटा आनी न्हंयां सयत तळयो, व्हाळ आनी झरींचो वापर उदका खातीर करपाची संद आसा. केंद्राच्या अमृत सरोवर येवजणे खाला तळी, झरी (उदकाचे स्रोत) सोदपाचो वावर सुरू आसा. आतां मेरेन 162 उदकाचे स्रोत सोदून काडल्यात. ह्या सगळ्या उदका स्रोतांच्या जतनायेचो वावर सुरू जाला.
दरेकी मतदारसंघांत आशिल्ले उदकाचे स्रोत आनी तातूंत आशिल्ल्या उदकाच्या प्रमाणाची म्हायती दिवपी पुस्तिका 9 ऑगस्टाक तयार जातली. दरेका आमदाराक पुस्तकाची प्रत मेळटली. दरेकी मतदारसंघांत कितलें उदक आसा, ताची म्हायती पुस्तिके वरवीं मेळटली.
राज्यांत सध्या 370 बांद आसात. ह्या बांदांची दुरूस्ती करपा सयत 2024 मेरेन आनीक 100 बांद बांदतले. राज्यांत उण्यांत उणे 400 बांद बांदपाची गरज आसा.
धरणाची तांक वाडयतले
साळावली तशेंच म्हैसाळ धरणाची तांक वाडोपाची येवजण आसा. गेटीची उंचाय वाडोवन साळावली धरणाची तांक वाडयतले. कुशावती न्हंयेचें उदक पंप करून तें साळावली धरणांत सोडटले. साळावलीचें 50 एमएलडी उदक वेर्णा व्हरून वाठाराक पुरवण करतले. हें उदक मुरगांव म्हालाक दिवप शक्य जातलें, अशें मंत्री शिरोडकार हांणी सांगलें.
कुशावती न्हंयेचें उदक मिराबाग सावन म्हैसाळ धरणांत सोडपाचो प्रस्ताव आसा. ताचे खातीर 7 ते 8 किमि पापपलायन घालची पडटली. म्हैसाळ धरणांतल्या उदकाची तांक वाडले उपरांत ओपांतल्या उदकाची मागणी उणी जातली. पंचवाडी, शिरोडें वाठाराक सध्या ओपा सावन उदकाची पुरवण जाता. म्हैसाळ धरणाची तांक वाडयले उपरांत ओपाचें उदक तिसवाडी म्हालाक दिवप शक्य जातलें, अशें मंत्री शिरोडकार हांणी स्पश्ट केलें.
धरणांतल्या उदकाचे गळटीचेर दवरतले नियंत्रण
धरणांतल्या उदकाची जी गळटी जाता, ताचेर नियंत्रण दवरतले. अंजुणे, आमठाणे धरणांतल्यान उदकाची गळटी जाता. दरेकी 15 दिसांनी धरणांतल्या उदकाचे पातळेचो नियाळ घेतले. उदकाचे पातळेचे 1 आनी 15 तारकेक मेजमाप जातलें.
दिवचल म्हालांत साळ गांवांत 250 एमएलडी प्रकल्पाचें काम सप्टेंबरांत सुरू जातलें. ह्या प्रकल्पांतल्यान 2024 मेरेन उदक मेळटलें. पेडणें म्हालांत न्हंयबाग आनी सत्तरी म्हालांत मोर्ले वठारांत उदकाचे प्रकल्प सुरू जातले.
करमळी तळ्या सयत हेर व्हड तळ्यांचें सोबितीकरण जातलें. म्हापशें तार न्हंयेंतलो गाळ काडपाचो वावर पावंड्या पावंड्यान जातलो. डिसेंबर मेरेन चिखल काडपाचो वावर सुरू जातलो.
कोको दर्यादेगेची राखम करचे खातीर राखणे वण्टीची निविदा जारी जाल्या. सप्टेंबरांत कामाचो बुनियादी फातर घालपाचें आस्वासन मंत्री सुभाष शिरोडकार हांणी दिलें.
15 ऑगस्टाचे फाटभुंयेर साळावली धरणाचेर रोशणाय करतले, अशेंय मंत्री शिरोडकार हांणी सांगलें.
म्हादय खटल्यांत वाग वाठाराचो घुस्पागोंदळ नाका
वाग वाठार आनी म्हादय खटलो हे वेगळे विशय. दोनूय प्रस्न एकठांय करपाची गरज ना. म्हादय खटल्यांत गोंयची बाजू घटमूट आसा. 28 नोव्हेंबराक सर्वोच्च न्यायालयांत सुनावणी जावपाची आसा. प्रवाह प्राधिकरण स्थापन जाला. जाय तेन्ना म्हादयचें उदक तशेंच कर्नाटकान केल्ल्या कामाची तपासणी करपाक मेळटली, अशें मंत्री सुभाष शिरोडकार हांणी सांगलें.
आरटीओक दितले टँकरांची वळेरी
उदकाची पुरवण करपी टँकरांचे नंबर आनी भलायकी खात्याची एनओसी आमी दरेकी म्हालांतल्या येरादारी पुलिसांक दितले. आरटीओक लेगीत टँकरांची वळेरी दितले. बेकायदो टँकरांचेर कारवाय करप येरादारी पुलिसांक शक्य जातलें, अशें मंत्री सुभाश शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
