भांगरभूंय | प्रतिनिधी
जिल्होधिकाऱ्यांचो आदेश; सत्तरे आनीक खुबश्यो खणीं पावसांत घातक
वाळपय: बेकायदो चिऱ्यांखणींनी पावसाच्या दिसांनी उदक सांठून उरता. भोंवतणीं दुरीग नाशिल्ल्यान मनीस वा जनावरां बुडून अपघात घडत आसतात. पोरूं वर्सा अशे तरेचो गंभीर अपघात सांगें वाठारांत घडिल्लो. हाची विशेश दखल घेवन सरकारान चिऱ्यांखणीं भोंवतणी राखणे दुरीग उबारपाचो निर्णय घेतला. सत्तरी म्हालांतल्या मलपण आनी वाघुरें ह्या दोन खणींचेर राखणे दुरीग बांदपाच्या कामाक सुरवात जाल्या.
जिल्होधिकाऱ्यान ह्या दोनूच सुवातांनी राखणे दुरीग बांदपाचे निदेश दिल्यात. हें काम पावसा पयलीं पुराय करचें अशे निदेश जिल्होधिकाऱ्यान दिल्ल्याची म्हायती सत्तरी म्हालाचे उपजिल्होधिकारी हांचे कडल्यान मेळ्ळ्या.
चिऱ्यांखणींनी व्हड प्रमाणांत चिरे काडले उपरांत पावसाच्या दिसांनी चिऱ्यांखण चलोवप शक्य नासता. कारण चिऱ्यांखणींनी पावसाचें उदक भरता. उदक वचपा खातीर वाट नासता. हाका लागून चिऱ्यांखण पुरायपणान भरून वता. पूण सरभोंवतणीं राखणे दुरीग नाशिल्ल्यान खूबशे फावटी रानवटी जनावरां, गोरवां आनी नागरीक बुडटात आनी तांकां मरण येता. अशे तरेचे अपघात पोरूं वर्सा घडल्यात. हाका लागून सरकारान हाची गंभीर दखल घेवन आपत्कालीन वेवस्थापना खाला चिऱ्यांखणीं भोंवतणीं राखणे दुरीग बांदपाचो निर्णय घेतला.
मजगतीं, सत्तरी म्हालांत खूबश्यो बेकायदो चिऱ्यांखणीं आसात. पूण जिल्होधिकाऱ्यान दोनूच चिऱ्यांखणींची निवड केली. हातूंत मलपण आनी वाघुरें ह्या दोन खणींचो आस्पाव आसा. जंय दुरीग बांदपाचें काम सुरू आसा. ह्यो दोनूय चिऱ्यांखणीं बेकायदो आसात. थंय सावन कोट्यांनी रुपयांचो म्हाल काडला. पूण संरक्षण प्रक्रियेची अंमलबजावणी केल्ली ना. ह्यो चिऱ्यांखणीं खाजगी जमनींत आसात. हाका लागून खाजगी जमनीच्या धनयांक हे खातीर जापसालदार धरप गरजेचें आशिल्लें. पूण सरकारान कोट्यांनी रुपया खर्च करून अशा बेकायदो चिऱ्यांखणींचे भोंवतणी राखणे दुरीग उबारपा खातीर घेतिल्ल्या निर्णया खातीर अजाप उक्तायतात.
उरिल्ल्यो चिर्यांखणीं घातक न्हय?
सत्तरी म्हालांत मलपण, गवाणें, मैंगिणें, मेळावली, वांते, मोर्ले, नगरगांव ह्या वाठारांनी चिऱ्यांखणीं आसात. ह्यो सगल्यो खणीं बेकायदेशीर आनी घातक स्वरुपाच्यो आसात. पूण सरकारान फक्त मलपण आनी वाघुरें ह्यो दोनूच चिऱ्यांखणीं कित्याक वेंचल्यो असो प्रस्न नागरिकांनी उपस्थीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
