भांगरभूंय | प्रतिनिधी
दिवचल: मयें वायंगिणी सरपंचपदार वासुदेव गांवकार जाल्यार उपसरपंचपदार सिमा आरोंदेकार हांची बिनविरोध निवड जाली.
काल (बिरेस्तारा) पंचायत कचेरेंत आयोजीत केल्ले विशेश बसकेंत दोनूय पदां खातीर दरेकी एकूच अर्ज सादर जाल्ल्यान निर्वाचन अधिकारी प्रतापराव राणे हांणी दोगांचीय बिनविरोध निवड जाल्ल्याचें जाहीर केलें. ह्या वेळार महादेव आर. नायक, सलील वेरेंकर हे अधिकारीय हाजीर आशिल्ले.
कांय दिसां पयलीं मयें पंचायतींत एके नाटकी घडामोडींत कनिवी कवठणकार हांकां सरपंचपदाची लॉटरी लागिल्ली. सरपंचपदा खातीर वासुदेव गांवकार आनी कनिवी कवठणकार हांणी अर्ज दाखल केल्ले.
त्या वेळार जाल्ल्या मतदानांत दोनूय उमेदवारांक दरेकी पांच-पांच मतां मेळिल्लीं. जाल्यार एक मत तंत्रीक कारणाक लागून बाद थारिल्ल्यान लॉट्साच्या माध्यमांतल्यान सरपंचपदाची निवड करतना कनिवी कवठणकार हांणी बाजी मारली.
पूण उपरांत कांय वरां भितरच सात पंच वांगड्यांनी सरपंच आनी उपसरपंच हांचे आड अविस्वास थारावाची नोटीस दाखल केल्ल्यान दोनूय पदां रितीं जाल्लीं.
मयें पंचायतींत वट्ट 11 पंचायत वांगडी आसात. सिमा आरोंदेकार, विद्यानंद कारबोटकार, वासुदेव गांवकार, विशांत पेडणेंकार, विनिता पोळे, कृष्णा चोडणकार, वर्षा गडेकार कनिवी कवठणकार, सुवर्णा चोडणकार, दिलीप शेट, सुफला चोपडेंकार हे 11 वांगडी आयज हाजीर आशिल्ले.
आमदार प्रेमेंद्र शेट हांणी सरपंच आनी उपसरपंच हांकां सगल्यांनी तेंको दिल्ल्यान सगले वांगडी संघटीत आसून मयें गांवच्या विकासाक सगलें तें सहकार्य करतले अशें स्पश्ट केलें. सरपंच वासुदेव गांवकार हांणी सगल्यांक बरोबर घेवन आमदार प्रेमेंद्र शेट हांच्या मार्गदर्शना खाला विकासाक चालना दिवपाचो प्रामाणीक यत्न करतलों अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
