भांगरभूंय | प्रतिनिधी
भांगरभूंय । प्रतिनिधी
पणजीः वास्को हांगच्या मंदार सुर्लकार खून प्रकरणांत जल्मठेप जाल्ल्या रोहन पै धुंगट, नफियाज शेख, शंकर तिवारी आनी जोविता रायन पिन्टो हांकां बंदखणींतल्या सोडपाक बाल न्यायालयांन निगेटिव्ह मत दिल्ल्यान राज्य सरकार तशेंच खास्त पुनरावलोक मंडळान तांकां मुक्त करपाचो प्रस्ताव निमाणे भायरायला. बंदखणीतल्यान ख्यास्त सोपचे पयलीं सुटका करची हे खातीर आरोपींनी दाखल केल्ले याचिकेचेर मुंबय उच्च न्यायालयाच्या गोंय खंडपिठान आपलो निकाल राखून दवोरला.
वास्को हांगचो डीजे मंदार सुर्लकार हांचे आरोपींनी 14 ऑगस्ट 2006 दिसा अपहरण करून ताच्या बापाय कडल्यान 50 लाख रुपयांचे खंडणीची मागणी केल्ली. मंदार हाचो खून करून ताची कूड तांणी आर्ला-केरी हांगा रानांत उडयल्ली. तेन्नाचो पणजे पुलीस स्टेशनाचो निरीक्षक महेश गांवकार हाणे हे खून प्रकरणाची चवकशी करून उपरांत बाल न्यायालयांत ताचे आड खूनाचे आरोपपत्र दाखल केल्ले.
23 जून 2014 दिसा न्यायालयान माफीचो साक्षिदार अल सलेटा बेग हाका सोडून बाकीच्यांक 10 हजार रुपयांचो दंड आनी जल्मठेपेची ख्यास्त फर्मायल्ली. तांणी हे ख्यास्तीक तांणी मुंबय उच्च न्यायालयाच्या गोंय खंडपिठान आव्हान दिल्या उपरांत ताची ख्यास्त कायम केल्ली. मंदाराच्या बापायन आरोपींक फांशीची ख्यास्त दिवपाची मागणी केल्ली याचिका खंडपिठान न्हयकारिल्ली.
ख्यास्त पुनरावलोक मंडळान 18 सप्टेबर 2020 दिसा जाल्ले बसकेंत चारूच आरोपींक खास्य सोपचे पयलीं सोडपाचो प्रस्ताव सरकाराक सादर केल्लो. सरकारान बाल न्यायालयाक बाज मांडपाक सांगल्लें. तांणी 5 मार्च 2011 दिसा ताका न्हयकार कळयल्लो. त्या उपरांत 10 मे 2021 दिसा सरकारान आरोपींक सोडपाक न्हयकार दिल्लो. ह्या आदेशांक आरोपींनी खंडपिठान आव्हान दिल्लें.
ख्यास्त पुनरावलोक मंडळान आरोपींक मुक्त करपाचो प्रस्ताव मंजूर केल्लो तेन्ना तांणी 14 वर्सांची ख्यास्त पुराय करूं ना असो दावो मंदराच्या बापायन केल्लो. खंडपिठान हे संबंदी बंदखण म्हानिरीक्षाक प्रतिज्ञापत्रा वरवी म्हायती दिवपाक सांगल्लें. खंडपिठान दोनूय पक्षांची बाजू आयकून आपलो निवाडो राखून दवोरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
