भांगरभूंय | प्रतिनिधी
येजमान बांगलादेशा आड चालू आशिल्ले दुसरे टॅस्टीच्या दुसऱ्या दिसा भारतान पयल्या डावाच्या आदाराचेर 87 धांवड्यांची आघाडी घेतली. भारताचो डाव 314चेर सोंपलो. ऋषभ पंतान सगल्यांत चड 93 धांवड्यो केल्यो. जाल्यार श्रेयस अय्यरान 87 धांवड्यांचें योगदान दिलें. बांगलादेशा वतीन ताइजुल इस्लाम आनी शाकिब अल हसन हाणें दरेकी चार विकेटी घेतल्यो.
दुसऱ्या दिसाचो खेळ सोंप मेरेन बांगलादेशान आपल्या दुसऱ्या डावांत बिनबाद 7 धांवड्यो केल्यात. अशे तरेन भारता कडेन अजून 80 धांवड्यांची आघाडी आसा. बांगलादेशाचो पयलो डाव 227 धांवड्यांचेर सोंपिल्लो.
ऋषभ पंतान कारकिर्दींतलो 11वो अर्द शेंकडो पुर्ण केलो. ताका फक्त सात धांवड्यांनी सवो शेंकडो चुकलो. जाल्यार अय्यरान पांचवो अर्द शेंकडो पुर्ण केलो. ताका कारकिर्दींतलो दुसरो शेंकडो चुकलो. पूण, दोगांयनी पांचवे विकेटी खातीर 159 धांवड्यांची भागिदारी करून भारताक बरे स्थितींत हाडलो.
दुसऱ्या दिसाचें पयलें सत्र बॉलर तैजुल इस्लामान गाजयलें. ताणें भारताच्या टॉप तीन बॅट्समनांक तंबूंत धाडले. ताणें मुखेली लोकेश राहुल (10), शुभमन गिल (20) आनी चेतेश्वर पुजारा (24) हांकां तंबूंत धाडले. जेवणाच्या विसवा मेरेन भारताचो स्कोर 3 बाद 86 असो आशिल्लो.
दुसऱ्या सत्रांत भारताच्या बॅट्समनांनी आपलो शेक दवरलो. ह्या सत्रांत 140 धांवड्यो केल्यो. ह्या सत्रांत बांगलादेश विकेट घेवपाक अपेशी थारले. फकत एकूच विकेट तस्कीन अहमदाक फावो जाली. च्या च्या विसवा उपरांत भारताचो स्कोर 4 बाद 226 आशिल्लो. ह्या सत्रांत पंत आनी अय्यर हांणी आपलो शेक दवरलो.
तिसऱ्या सत्रांत बांगलादेशाच्या बॉलरांनी पुनरागमन केलें. सत्राची सुरवात भारतान 4 बाद 226 वरवीं केली. पूण, दीस सोंपता सोंपता भारताचो डाव 314चेर सोंपलो. उपरांत बांगलादेशान दुसऱ्या डावांत सात धांवड्यो केल्यो. ह्या सत्रांत भारतान 88 धांवड्यो करतना स विकेटी वगडायल्यो. हातूंत अर्द शेंकड्यांची नोंद करपी पंत आनी अय्यर हांचो लेगीत आस्पाव आसा.
पुजारा सात हजारी
चेतेश्वर पुजारान टॅस्ट कारकिर्दींतल्यो सात हजार धांवड्यो पुर्ण केल्यो. ताका ह्या पांवड्या मेरेन पावपाक 167 डाव लागले. ताणें सचीन तेंडुलकर, राहुल द्रविड, सुनील गावस्कर, व्ही व्ही एस लक्ष्मण, वीरेंद्र सेहवाग, विराट कोहली, सौरव गांगुली सारक्या दिग्गजांचे वळेरेंत सुवात मेळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
