भाजपाचे नवे बाटलेंत पोरणोच सोरो

भांगरभूंय | प्रतिनिधी

फ्रांसीस सार्दीनः गोंय प्रदेश काँग्रेस समिती वतीन राजीव गांधी हांकां आर्गां

भांगरभूंय । प्रतिनिधी

पणजीः देशांत आनी गोंयांत सगळ्यांत चड काळ काँग्रेसीची सत्ता आशिल्ली. ह्याच काळांत देशाक उदरगतीच्या मार्गार व्हरपी खूबशे मुळावे निर्णय घेतले. मात सध्याचे स्थितींत भाजपा सरकार सगळें कितें आपणेंच केल्ल्याच्या झेतान वावुरता. खरें म्हणल्यार भाजपा पोरणोच सोरो नवे बाटलेंत घालून आपणें नवो सोरो केल्ल्याचो दावो करता. असा उतरांनी काँग्रेसीचे ज्येश्ठ फुडारी आनी खासदार फ्रांसीस सार्दीन हांणी भाजपाक थोमणो मारलो.

आदले प्रधानमंत्री आनी काँग्रेस फुडारी राजीव गांधी हांचे 31 वे पुण्यतिथी निमतान पणजे काँग्रेस भवनांत आयोजीत केल्ले आर्गां ओंपपाचे कार्यावळी सार्दीन उलयताले. कार्यावळीक विरोधी पक्ष फुडारी मायकल लोबो, आदले उपसभापती शंभू बांदेकार, प्रदेशाध्यक्ष अमीत पाटकार, गोंय प्रदेश महिला काँग्रेस अध्यक्ष बिना नायक, सरचिटणीस प्रदीप नायक, आमदार रुडॉल्फ फर्नांडीस, डिलायला लोबो हांचे सयत पदाधिकारी हाजीर आशिल्ले.

कांय वर्सां सत्तेंत नासत जाल्यार लोक विसरून वतात. हे खातीर लोकां खातीर विवीध कामां करून आमी तांच्या संपर्कांत रावपाक जाय. तशेंच सगळ्यांनी एकवटान काम करपाक जाय, अशें सार्दीन हांणी सांगलें.

बिना नायक हांणी सांगलें, राजीव गांधी हांचे कडेन आशिल्ले दूरदृश्टीक लागून देशांत म्हायती तंत्रज्ञान रुजलें. ताकाच लागून आयज प्रधानमंत्री तांची ‘मन की बात’ करपाक शकतात.

राजीव गांधी 21 व्या शेंकड्याचे रचनाकार आसात. अटल बिहारी वाजपेयी हांकां उपचारा खातीर अमेरिकेंत धाडपी राजीव गांधी हांणी विरोधी पक्ष फुडाऱ्याक लेगीत समान सन्मान दिलो, अशें शंभू बांदेकार हांणी सांगलें.

मायकल लोबो हांणी सांगलें, सगळ्यांनी एकठांय येवन राजीव गांधी हांचें सपन पुराय करचे खातीर यत्न करपाक जाय. देशांतल्या तरणाट्यां खातीर तांणी खूब वावर केलो. हेच खातीर आयज विवीध मळांचेर हांगाचे तरणाटे नेटान मुखार पावलां मारतात.

गोंयांत विवीध पांवड्याचेर काँग्रेस घटमूट करपा खातीर यत्न करता अशें अमीत पाटकार हांणी सांगलें. बिना नायक हांणी उपकार मानले.

गांधीं बगर पर्याय नाः सार्दीन

देशांत आयज कितेंय जालें तरी गांधी कुटुंबाक लक्ष्य करतात. मात देशा खातीर गांधी कुटुंबान खूब कश्ट सोंसल्यात, खूब त्याग केल्यात. ताका लागून गांधीं बगर पर्याय ना, अशें फ्रांसीस सार्दीन हांणी सांगलें.

चोडणकर, कामत गैरहाजीर

पक्षाचे आदले प्रदेशाध्यक्ष गिरीश चोडणकार आनी आदले विरोधी पक्ष फुडारी दिगंबर कामत हे दोगूय कार्यावळीक हाजीर रावूंक नाशिल्ले. वेंचणूक काळांत सगळे कडेन दिसपी हीं दोन मुखामळां पक्षाचे कार्यावळीक मात दिसलीं नात. एकवटान काम करपाच्या भाशणा उपरांत जाल्यार ही गैरहाजेरी मात सामकीच नदरेंत भरली.