भांगरभूंय | प्रतिनिधी
भांगरभूंय । प्रतिनिधी
पोरणे गोंयः राज्यांतल्या अनियोजीत आनी बेकायदेशीर बांदकामां विशीं हुस्को उक्तायना अश्या बेकायदेशीर बांदकामांक लागून उदका पुरवणेचेर ताण पडटा. ताका लागून तांकां उदकाचे बील दुपेटीन लागू करतले अशें बांदकाम मंत्री नीलेश काब्राल हाणे जाहीर केलां. कुमाजुंवें मतदारसंघांतली उदका पुरवण सुदारपा खातीर ‘हर घऱ नल से जल’ येवजणेक सुरवात करतना तशेंच खोर्ली हांगा जल जीवन मिशना खाला बांदिल्ले 800 घन मीटर तांकीच्या उदका टाकयेचें उक्तावण केल्या उपरांत काब्राल उलयतालो.
जमनीचे प्लॉट करतना उक्ती सुवात दवोरनात. ते सुवातेंत लेगीत बेकायदेशीरपणान प्लॉट करून ते लोकांक विकतात. ताका लागून अश्या सुवातांनी उदका पुरवणे खातीर टाकयो आनी हेर साधन सुविधी उबारप बांदकाम खात्याक शक्य जायना. जायती सुवात सोडनास्तना जी बेकायदेशीर बांदकामां करतात ताकां दुपेट दरान उदका पुरवण करपा विशीं आपणे मुख्यमंत्र्यां कडेन चर्चा केल्या अशें काब्राल हाणे सांगलें
खोर्ली हांगा उक्ती सुवात आशिल्ल्यान थंय उदका टाकी बांदप शक्य जाले अशें सागून ‘हर घऱ नल से जल’ कार्यावळी खाला कुमारजुवें मतदारसंघात 11 कोटी रुपया खर्च करून उदका टाकयो बांदपाचें जें काम चल्लां तें फुडल्या तीन म्हयन्यांत पुराय जातले अशें ताणे सांगलें. पावस पडपाक कळाव जाल्ल्यान सध्या राज्यांत उदकाचो उणाव जाला. दोन धरणांतलें उदक उणे जालां. लोकांनी जाय तितलेंच उदक वापरचें अशें आवाहन काब्राल हाणे केलां.
खोर्ली हांगा बांदिल्ले टांकयचो लाब सुमार 500 घरांक जातलो. आणीबाणीच्या वेळार हेर वाठारांत उदक घुंवडावपा खातीर हे टाकये कडल्यान खासा पायपलायन घातल्या अशें थळावो आमदार राजेश फळदेसाय हाणे सांगलें. मानगादो हांगच्या सुमार 20 घरांचो उदकाचो प्रश्न फुडल्या स म्हयन्यांत सुटावो करतले अशी म्हायती ताणे दिली. उक्ती सुवात उपलब्ध आशिल्ल्यान खोर्ली पंचायत वाठारांत जमनीचेर उदका टांकी बांदप 50 उपरांत शक्य जालें अशें खोर्लीचो सरपंच बाप्तीस परेरान सांगलें. कार्यावळीक करमळीचो सरपंच कुस्ता सालेलकार, खोर्लीची उपसरपंच सुप्रिया केरकार, बांदकाम खात्याचो कार्यकारी अभियंतो निवृत्ती पार्सेकार, पंच आनी थळावे लोक हाजीर आशिल्ले.
भोमा फ्लायओव्हर बांदतले
मजगतीं, चार पदरी रस्त्याक लागून भोमा हांगची देवळां मोडपाक पडचीं न्हय म्हणून त्या वाठारांत फ्लायओव्हर बांदतले अशी म्हायती बांदकाम मंत्री नीलेश काब्राल हाणे खोर्ले टांकयेचें उक्तावण करपाक आयिल्ले कडेन पत्रकारांक सांगलें. खोर्ली तें भोमा मजगतीं चार पदरी रस्तो बांदपाचें कांय वर्सां आदी थारल्लें. ह्या रस्त्याक लागून जांची घरां वा दुकानां वतलीं तांका लुकसाण भरपाय दिवपाची सरकाराची तयारी आसा, अशें ताणे सांगलें.
खोर्ले आनी भोमा वाठारांत कांय पोरणी घरां आसात. हालीं साराक जी घरां बांदल्यात तांका सेटबॅक नाशिल्ल्यान ती वाटावप शक्य ना. जी पोरणी घरां आसात तांका घरां बांदपाक सुवात दितले आनी घरां बांदून जाय मेरेन तांका भाड्याचे सुवातींत रावपाक सरकार भाडें दितलें. उदरगती खातीर त्याग करचोच पडटलो अशे काब्रालान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
