आयच्यान शिरगांवां भक्तीमय वातावरण

भांगरभूंय | प्रतिनिधी

दिवचल: लाखांनी भाविकांचें श्रद्धास्थान आशिल्ल्या शिरगांवच्या श्रीदेवी लयराईचे जात्रेक आयच्यान सुरवात जाता. फुडले पांच दीस हजारांनी भाविकांची पावलां शिरगांवचे दिकेन पडटलीं आनी हे खातीर भक्तांचो महापूर येतलो. गोंय प्रशासनान फाटल्या वर्साचे दुर्घटणेचे फाटभुंयेर अंदूं खर अशीं मार्गदर्शक तत्वां घालून पुराय तयारी केल्या. फुडले पांच दीस ताका खर पाळो दिवन भाविकांनी, धोंडांनी पुराय सहकार्य करून जात्रेचो उत्सव पुरायपणान येसस्वी करपाक सहकार्य करपाचें आवाहन प्रशासना वतीन तशेंच देवस्थान समिती वतीन केलां.

जिल्होधिकारी अंकीत यादव, पुलीस अधिक्षक हरीश मडकयकार, निरिक्षक विजय राणे, उपजिल्होधिकारी शुभम नायक, मामलेदार शैलेंद्र देसाय हांचे सयत येरादारी पुलीस आनी उजो पालोवपी दळ आनी संबंदीत सगल्या सरकारी अधिकाऱ्यांनी फाटल्या स म्हयन्यां सावन शिरगांवां वेगळे वेगळे तरेन तयारी करून ती पुराय केल्या. ताका लागून खूबशा मार्गदर्शक तत्वांक खरपणान पाळो दिवपाचें आवाहन कलां. भाविकांनी तशेंच धोंड हांणी पुरायपणान सहकार्य करपाचें आवाहन प्रशासना वतीन केलां.

मयेंचे आमदार प्रेमेंद्र शेट हांणी फाटले कांय दीस सेगीत शिरगांवचे तयारीचो नियाळ घेतला. लोकांनी पुरायपणान सहकार्य करपाचें आवाहन तांणी केलां. कसलेच तरेची गर्दी करिनासतना शिस्तीक पाळो दिवपाचें आवाहन केलां. देवस्थान समितीचे अध्यक्ष दीनानाथ गांवकार आनी तांच्या पुराय पंगडान फाटले स म्हयने प्रशासना बराबर पुराय तरेन सहकार्य करतना मजत कार्यांत तशेंच वेगळे वेगळे प्रक्रियेंत गुथून तांणी बरी वेवस्था दवरपा खातीर सहकार्य केलां. येरादारी वेवस्था, ज्येश्ठ नागरीक, ल्हान भुरगीं हांचे खातीर खबरदारी घेवपा खातिरूय सगले तरेची यंत्रणा तयार दवरल्यांत.

शिरगांवां तयारीचो नियाळ घेवपी मॉक ड्रील केलें. हातूंत सुमार 900 पुलीस कर्मचारी तशेंच 300 परस चड सरकारी खात्याचे अधिकारी तशेंच ग्रामस्थ, देवस्थान समितीचे पदाधिकारी, उजो पालोवपी दळ आनी हेर वेवस्थापन गुथिल्ले.

जात्रेंत 94 सीसीटीव्ही कॅमेरे बसयल्यात. ह्या कॅमेऱ्या वरवीं भाविकां सयत धोंडांचे हालचालीचेरूय खर नदर दवरतले. जात्रा वेवस्थीत तरेन पार पडची हे खातीर पुलिसांनी ‘मास्टर प्लॅन’ तयार केला. शिरगांवां कायदो आनी सुवेवस्था बरी उरपा खातीर पुलिसांनी मास्टर प्लॅन तयार केला. सरकार तशेंच प्रशासन पांवड्यार विवीध येवजण्यो आंखल्यात. जात्रे खातीर जिल्होधिकारी कचेरी, उत्तर गोंय पुलीस अधिक्षक कचेरी, दिवचल पुलीस स्टेशन हांचे कडल्यान विशेश उपाय येवजण्यो केल्यात. पुलीस अधिक्षक, उपविभागीय पुलीस अधिकारी, तशेंच थळावे पुलीस अधिकारी हांचे कडल्यान जात्रे निमतान सुरक्षा वेवस्था खर केल्या. रातच्या 8 उपरांत सोरो पियेवन येवपी मनशांक प्रवेश बंद करतले. कसलेच तरेचो गैरप्रकार जावचो न्हय हे खातीर पुलिसांनी सादुरताय बाळगिल्या.

जात्रेच्या दिसांनी पुलीस अधिकारी तशेंच कर्मचारी दीस-रात ड्युटी करतले. भाविकांचे सुरक्षे खातीर तशेंच कसलीच वायट घडणूक घडची न्हय म्हूण पुलीस सेगीत गस्त घालतले.

पुलीस निरिक्षक विजय राणे हांणी सांगलें, जात्रेचे फाटभुंयेर सगले तरेची उपाय येवजण केल्या. भाविकांक कसलोच त्रास जावचो न्हय हे खातीर येरादारी नियंत्रण, पार्कींग वेवस्था तशेंच गर्दी नियंत्रणा खातीर विशेश पंगड तयार करतले. वाठारांत 94 सीसीटीव्ही कॅमेरे बसयल्यात. ह्या कॅमेऱ्यांचे मजतीन पुराय वाठाराचेर लक्ष दवरतले. कसलीय दुबावीत हालचाल दिसून येत जाल्यार ताचेर रोखडीच कारवाय करतले.

मजगतीं, जात्रेक लागून दरवर्सा शिरगांव मेरेन व्हड अशीं दुकानांची फेरी भरता. पूण अंदूं हाचेर निर्बंध घाल्यात. खाज्याच्या दुकानां खातीर देवळाचे फाटले वटेन सुवात दिल्या. जाल्यार कांय दुकानां होमखणाचे सुवातेर सुवात दिल्या. अशें आसलशें तरी आनीक खंयच फेरी नासतली. पुराय रस्तो मेकळो दवरपाची वेवस्था केल्ल्यान शेंकड्यांनी भाविकांक फेरयेच्या उणावाक लागून खरेदी करिनासतना वच्चें पडटलें. ताका लागून कांय भाविकांनी निरशेणी उक्तायली. पूण भाविकांची सुरक्षा म्हत्वाची आशिल्ल्यान प्रशासनान फाटल्या वर्साचे फाटभुंयेर अंदूं खर निर्बंध घालून बरी वेवस्था दवरल्या. ते खातीर सगल्यांनी सहकार्य करपाचें आवाहन केलां.

हजारांनी धोंड, गोंय, महाराष्ट्र, कर्नाटक आनी हेर वाठारांतल्यान पांच दीस, तीन दीस देवीचे व्रत करतात. होमखणांतल्यान वचपा खातीर धोंड सज्ज आसात. उपास केल्ले धोंड निर्विघ्नपणान अग्नी दिव्य साकारतात हें दृश्य पळोवपा खातीर व्हड संख्येन लोकांची गर्दी आसता. ताका लागून प्रशासनान ह्या वेळार खर वेवस्था दवरल्या आनी भाविकांनी सहकार्य करपाचें आवाहन केलां.

देवीक मोगरेची फुलां आवडटात. हे खातीर ह्या पांच दिसांचे जात्रे निमतान लाखांनी रुपयांची मोगरेच्या कळ्यांच्या फुलांची उलाढाल जातली. ते खातीर वेगळ्या वेगळ्या वाठारांतल्यान फुलां विकपी ह्या वाठारांत आयल्यांत. फुलां विकप्यां खातीर प्रशासनान वेगळी वेवस्था केल्या.

देवळाक विद्युत रोशणायेन सजयलां. घरा कणकणीं रांगोळी तशेंच तोरणां बांदून थळाव्या लोकांनी आपली सज्जताय दाखयल्या. हजारांनी लोक आपल्या सोयऱ्यांगेर, इश्टांगेर शिरगांवां येत आशिल्ल्यान थळाव्यांनी आपले परीन सगले तरेची तयारी केल्या.

मुख्यमंत्री डॉ. प्रमोद सावंत हांचें आवाहन

मुख्यमंत्री डॉ. प्रमोद सावंत हांणी हजारांनी येवपी भाविकांक लइराई देवीच्या जात्रे निमतान शुभेच्छा दिल्यात. सगल्यांनी शिस्तीक पाळो दितना कसलेच तरेची गडबड, गोंदळ करिनासतना शांततायेन देवीचें दर्शन घेवचें. तशेंच कोणाकूय कसलोच त्रास जावचो न्हय हाची खबरदारी दरेकान घेवची अशें भावनीक आवाहन केलां.

देवस्थान समितीचे अध्यक्ष दीनानाथ गांवकार हांणी सगल्या भाविकांक पांच दीस देवीचें दर्शन घेतना पुरायपणान योग्य पद्दतीक पाळो दिवन कसलेच तरेची गडबड, बोवाळ करिनासतना शिस्तीन दर्शन घेवचें. सगल्यांक दर्शन उक्तें आसून दरेकान दर्शन घेवन देविचो आशिर्वाद घेवपाचें आवाहन केलां.

—

22 एप्रील मेरेन सोऱ्याचीं दुकानां बंद

जात्रेक लागून 22 एप्रील दनपारां 12 वरां मेरेन सगलीं सोऱ्याचीं दुकानां बंद दवरपाचो आदेश जिल्होधिकारी कचेरेन दिला. भारतीय दंड संहिता कलम 144 खाला हो आदेश जारी केला. हातूंत पांच गांवांचो आस्पाव आसा. ह्या नेमाक पाळो दिलो ना जाल्यार खर कारवाय करतले अशें आदेशांत स्पश्ट केलां. थळावे पुलीस आनी अबकारी विभागाक ह्या आदेशाक खरपणान पाळो दिवपाचे निदेश दिल्यात.