भांगरभूंय | प्रतिनिधी
म्हापशें: आयज (सोमारा) मिलाग्रीस सायबिणीचें फेस्त भक्तीभवान मनयलें. ईस्टराच्या तिसऱ्या सोमारा मनयतल्या ह्या फेस्ताक गोंया बराबरच शेजारच्या राज्यांतल्या भाविकांनी व्हड संख्येन हाजेरी लायिल्ली.
भक्तांच्या उल्याक धांव घेवपी सायबीण म्हूण क्रिस्तांव तशेंच हिंदू आनी हेर समाजांतल्या भाविकां मदीं सायबिणी विशीं श्रद्धा आसा. फेस्ता वेळार सायबीण आनी तिचे कडे वेलो येसू ख्रिस्त हांच्या पुतळ्याचेर भक्तांनी तेल, फुलां घालून मेणवाती पेटयल्यो.
मिलाग्रीस सायबिणीच्या फेस्ता निमतान सेंट जेरॉम चर्चीत फांतोडेर 5.30 वरां सावन सांजवेळा मेरेन प्रार्थना जाल्यो. ह्यो प्रार्थना कोंकणी आनी इंग्लीशींत जाल्यो. सकाळीं 10 वरांचेर फेस्ताची मुखेल प्रार्थना धर्मगुरू फा. केनेथ तेलीस हांच्या मार्गदर्शना खाला जाली. ह्या वेळार फा. लिओनार्डो मोरायस, फा. सावियो जे. पिंटो आनी फा. आगुस्तीन आल्फोन्सो आनी हेर हाजीर आशिल्ले.
ताचे पयलीं चर्चींत मिलाग्रीस सायबीण आनी तिचे कडेर येसू ख्रिस्त हांचे तकलेर क्रावन मुकूट घालो. दरवर्सा फेस्ता निमतान चर्चीत 19 वेर मेरेन पांच दीस विवीध सांस्कृतीक आनी मनरिजवणेच्या कार्यावळींचें आयोजन केल्लें. हातूंत खेळ, पाककला, हावझी तशेंच 20 वेर सांजवेळा 7.30 वरांचेर केल्ल्या मापान भोग हो तियात्र सादर केलो.
जाल्यार 21 वेर बुधवंत जाकी हो तियात्र, 22 वेर स्क्वेर हेड्स आनी 23 वेर क्ले जार्स ही डिझे कार्यावळ आनी 24 वेर नाचो या कुंपासार हो सिनेमा दाखयतले.
मिलाग्रीस सायबीण ही शिरगांवच्या श्रीलयराई देवीची भयण म्हूण भावीक वळखतात. श्रीलइराईची जात्रा अंदूं 21 एप्रील म्हणल्यार आयज सावन सुरू जातली. शिरगांव सावन मिलाग्रीस सायबिणीक तेल जाल्यार म्हापशें सावन देवी लयराईक फुलां भेट दिवपाची परंपरा आसा. ही परंपरा फाटल्या किल्याशाच वर्सां सावन अखंडीतपणान चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
