भांगरभूंय | प्रतिनिधी
साधन सुविधा, अभ्यासाच्या ताणांक लागून वजें उणें करप अशक्यः शिक्षण संचालक
भांगरभूंय । प्रतिनिधी
पणजीः विद्यार्थ्यांच्या शाळांच्या बॅगाचें वजन भुरग्यांच्या वजनाचे तुळेंत 10 टक्के परस कमी आसपाक जाय ह्या निर्देशांक काय शाळांच पाळो दितात. पुस्तकांची संख्या कमी करून विद्यार्थ्यांच्या बॅगांचें वजन कमी करपाचे आमी आठ वर्सा पयलीं निर्देश दिल्ले. पूण काय कारणांक लागून शाळांक तें करप शक्य नाशिल्ले कारणान भुरगी बॅगांत वजें भरून शाळेक वतना नदरेक येतात, अशी म्हायती शिक्षण संचालक शैलेश झिंगडे हांणी दिली.
राष्ट्रीय भुरगीं हक्क राखण आयोगान काडिल्ल्या पत्रकाच्या आदाराचेर शाळेक वचपी विद्यार्थ्यांच्या बॅगांचें वजन तांच्या वट्ट वजनाचे तुळेंत 10 टक्के परस चड आसचें न्हय अशें परिपत्रक शिक्षण संचालनालयान काडिल्ले. हे खातीर शाळांनी संदर्भ पुस्तकांचो वापर कमी करचो, वेळापत्रका नुसार तांका पुस्तका हाडपाक सांगचीं आनी पुस्तका शाळेंत दवरपा खातीर लॉकर्स दिवचे अशें संचालनालयान सांगिल्लें.
हे विशीं उलयतना शिक्षण संचालक शैलेश झिंगडे हांणी सांगलें, बॅगांच्या वजना विशीं उगडास करून दिवपा खातीर आमी कसलीच नवी सुचोवणी काडूंक ना. फकत 2017त खात्यान एक परिपत्रकच काडिल्लें.
जेन्ना शिक्षका वांगडा आमची बसका जाता तेन्ना आमी उगडास करून दितात. पयलींचें परिपत्रक आसा तें काय जाण व्हॉटसेप ग्रुपच्या माध्यमांतल्यान शाळे मेरेन पावोवन तांची जाणविकाय करून दितात. तशेंच शाळा वेवस्थापन आनी विभागीय शिक्षण अधिकारी हांचे बसकेंत आमी हे विशीं तांका सांगतात, अशी म्हायती झिंगडे हांणी दिली.
काय शाळांनी ह्या निर्देशांक पाळो दितात. पूण काय शाळा अशो आसात हें आमी करता म्हूण सांगतात. पूण प्रत्यक्षात विद्यार्थी जड बॅगां घेवन शाळेंत वतना आमका नदरेक येतात. बॅगांचें वजन उणें उरचें म्हूण आमी शाळांक सांगिल्लें की तांणी विद्यार्थ्यांक नवी पुस्तका घरा दवरपाचें सांगून शाळेंत पयलींच्या पुस्तकांचो वापर करून तांकां शिकोवचें, अशे झिंगडे हांणी म्हणलें.
पूण काय शाळा हें करूंक पावनात हे खातीर खुबशीं कारणां आसात. काय शाळां कडेन पयलींचींपुस्तकां सांठोवन दवरपा खातीर लॉकर्स नात. तशेंच कांय शाळा सकाळीं आनी दनपरां अश्यो वेगवेगळ्या शिफ्टींनी वर्ग घेतात आनी जेन्ना परिक्षेची तयारी करची आसता तेन्ना चड पुस्तकां व्हरपा बगर काय पर्याय नासता देखून हें बॅगांचें वजन वाडिल्लें आसता, अशें झिंगडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
