बाणावली जिल्हो पंचायत वांगडी हॅन्झेल फर्नांडीसाचें ओबीसी प्रमाणपत्र रद्द

भांगरभूंय | प्रतिनिधी

-ख्रिश्चन सुतार विश्वकर्मा जातींत आस्पाव जायनाः खंडपीठ

पणजीः ख्रिश्चन सुतार हे विश्वकर्मा, च्यारी आनी मेस्त ह्या गटांत येनात. ताका लागून हेर मागासवगीय (ओबीसी) जातींत हांचो आस्पाव जावपाक शकना असो निवाडो गोंय खंडपिठान दिला. ताका लागून उपजिल्होधिकाऱ्यांनी बाणावलीचे जिल्हो पंचायत वांगडी हॅन्झेल फर्नांडीस हांणी जारी केल्ले जातीचें प्रमाणपत्र रद्द केलां. ते खातीर हॅन्झेल फर्नांडीस हांचे जिल्हो पंचायत वांगडीपद धोक्यांत आयलां. हे विशींचो निवाडो न्या. महेश सोनक आनी न्या. भारत देशपांडे हांणी जारी केला.

उदय च्यारी हांणी ह्या प्रकरणांत खंडपिठांत याचिका दाखल केल्ली. तातूंत तांणी राज्य सरकार, साश्ट उपजिल्होधिकारी, समाज कल्याण खातें, जाती छाननी समिती, गोंय राज्य हेर मागासवर्गीस जाती आयोग, हॅन्झेल फर्नांडीस, दक्षता खातें, गोंय राज्य वेंचणूक आयोग, ऑल गोंय कारपेंटर्स असोसिएशन ऑफ अक्सोना आनी पंचायत संचालकाक प्रतिवादी केल्या.

जिल्हो वांगडी हॅन्झेल फर्नांडीस हांणी तो ख्रिश्चन सुतार आसून विश्वकर्मा, च्यारी आनी मेस्त ह्या समाजाचे वांगडी आशिल्ल्याचो दावो केल्लो. ताणें हेर मागासवर्गीय जातीचें प्रमाणपत्र मेळयिल्लें. ते खातीर ताका उपजिल्होधिकाऱ्यांनी 4 जून 2010, 12 डिसेंबर 2013 आनी 5 मार्च 2020 त जातीचें प्रमाणपत्र दिल्लें. ते प्रमाण 5 मार्च 2020 त मेळिल्ल्या जातीचें प्रमाणपत्र वापरून तांणी 2020 त हेर मागासर्गीय जाती खातीर राखीव आशिल्ल्या बाणावली जिल्हो पंचायत वांगडी पदा खातीरची वेंचणूक लडयिल्ली. तातूंत तो जिखिल्लो. ते उपरांत याचिकादार च्यारी हाणें 5 फेब्रुवारी 2021 आनी 23 जून 2021 दिसा जाती छाननी समिती कडेन कागाळ दाखल करून ख्रिश्चन सुतार विश्वकर्मा, च्यारी आनी मेस्त ह्या समाजाचे वांगडी नाशिल्ल्याचो दावो केलो. ते उपरांत 13 फेब्रुवारी 2023 दिसा समितीन याचिकादाराचो दावो भायरायिल्लो. ते खातीर ताणें गोंय खंडपिठांत धांव घेवन याचिका दाखल केल्ली.

हे विशीं याचिकादारा वतीन अॅड. विठ्ठल नायक हांणी बाजू मांडली. तशेंच ख्रिश्चन सुतार विश्वकर्मा, च्यारी आनी मेस्त वांगडी जावपाक शकनात असो युक्तीवाद मांडलो. आनी हॅन्झेल फर्नांडीस हांचो हेर मागासवर्गीय जातीचें प्रमाणपत्र रद्द करपाचो युक्तीवाद मांडलो.