बाणस्तारी अपघात प्रकरणांत अमीत पालेकार हांकां अटक
भांगरभूंय | प्रतिनिधी
-ड्रायव्हर परेशाक वाटावपाक पुलिसांची केल्ली दिशाभूल
अटके उपरांत अंतरीम जामीन, तपासाक राजकी मोडण
पणजी : बाणस्तारी अपघात प्रकरणांत पुरावे नश्ट करपाच्या कथीत आरोपा खाला गुन्यांव फांट्यान आपाचे फुडारी आनी नामनेचे आदोगाद अमीत पालेकार हांकां बिरेस्तारा दनपारां अटक केली. जिल्हा आनी सत्र न्यायालयान सांजे तांकां अंतरीम जामीन मंजूर केलो. ह्या प्रकरणांत चालक राजू लमाणी हाका लेगीत अंतरीम जामीन मंजूर जाला. जामीन अर्जाचेर शुक्रारा सुनावणी जातली.
अपघात प्रकरणाचे चवकशे खातीर राजकी पक्षाच्या फुडाऱ्याक अटक जाल्ल्यान तपासाक आतां राजकी मोडण आयलां. बाणस्तारी आयतार 6 ऑगस्टाक सांजे 7 वराच्या सुमाराक हो भिरांकूळ अपघात जाल्लो. मसिर्डीज मोटारीचो धपको दोन दुचाकी आनी तीन मोटारींक बसून तिगांक मरण आयिल्लें. तशेंच अपघातांत चार जाण जखमी जाल्ले. अपघाता वेळार मसिर्डीज मोटारींत सोऱ्याच्यो बाटल्यो मेळिल्ल्यो. परेश सांवड्डेंकार आनी ताची घरकान्न मेघना सांवड्डेंकार आनी तांची दोन भुरगीं अपघाता वेळार मर्सिडीज मोटारींत आशिल्ली. मोटार परेश चलयतालो काय मेघना, हाचो तपास सुरू आसा. सरकारान तपास गुन्यांव फांट्या कडेन दिले उपरांत परेश तशेंच मेघनाची पुलिसां कडल्यान चवकशी सुरू आसा.
तपास सुरू आसतानाच बिरेस्तारा दनपारां पुलिसांनी अॅड. अमीत पालेकार हांकां चवकशे खातीर आपयलो. चवकशी जाले उपरांत तांकां अटक केली. अटक करून तांकां रायबंदर गुन्यांव फांट्यात व्हेले. मजगतीं, अॅड. अमीत पालेकार हांणी जामिना खातीर अर्ज केलो. जिल्हाे आनी सत्र न्यायाधीशानी फोंडें न्यायालयांत जामीन अर्जाचेर सुनावणी घेतली. तांकां अंतरीम जामीन मंजूर जाला.
अॅड. अमीत पालेकार हे सांवड्डेंकार कुटुंबीयांचे इश्ट आसात. अपघाता पयलीं एके पार्टीचे फोटे समाज माध्यमांचेर व्हायरल जाल्ले. ह्या फोटवांत परेश सांवड्डेकारा सयत अॅड. अमीत पालेकार लेगीत दिसताले. पार्टी सोंपले उपरांत घरा वतना तांचे मर्सिडीझ मोटारीक बाणस्तारी अपघात जाल्लो.
भाजपांत प्रवेश करपाक न्हयकार दिल्ल्यान अटक : अॅड. पालेकार
बाणस्तारी अपघाता कडेन म्हजो कसलोच संबंद ना. कांय दिसां पयलीं म्हाका भाजप प्रवेशाची ऑफर आशिल्ली. भाजपांत प्रवेश केलो ना, जाल्यार आडखळी येतल्यो, अशी शिटकावणी दिल्ली. हांवे ही ऑफर न्हयकारली. ते खातीर म्हाका अटक जाली. भाजपाचे हे ‘डर्टी पॉलिटिक्स’ आसा. अपघात तशेंच डमी चालका कडेन म्हजो कसलोच संबंद ना, अशें अॅड. अमीत पालेकार हांणी अटके उपरांत सांगलें.
मेघना आनी परेश सांवड्डेंकाराक अटक करात : आमदार व्हेंझी व्हिएगस
बाणस्तारी अपघात प्रकरणांत पुलिसांनी परेश सांवड्डेंकार आनी मेघना सांवड्डेंकार हांकां अटक करची, अशी मागणी आपचे आमदार व्हेंझी व्हिएगस हांणी केल्या. दोशींक वाटावपा खातीर अॅड. अमीत पालेकार हाची सतावणुक पुलिसांनी करची न्हय, अशेंय तांणी सांगलें.
अमीत पालेकार हांकांं अटक केले उपरांत आपचे कार्यकर्ते रायबंदरा गुन्यांव फांट्याच्या कचेरी कडेन एकठांय जाले.
‘इंडिया’ फुडाऱ्यांक लक्ष्य करपाचे यत्न : काँग्रेस
प्रदेश काँग्रेस अध्यक्ष अमीत पाटकार हांणी अमीत पालेकार हांचे अटकेचा निशेध केलो. बाणस्तारी अपघाताचो तपास लावपाक पुलीस अपेशी थारल्यात. ‘इंडिया’च्या घटक पक्षांच्या फुडाऱ्यांक लक्ष्य करपाचे हे यत्न आसात, अशें अमीत पाटकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
