भांगरभूंय | प्रतिनिधी
पर्यटन ब्रँडाचो पुरस्कार टाटा ग्रूप इंडियन हॉटेल्साक
भांगरभूंय । प्रतिनिधी
पणजीः व्हायब्रंट गोवा वतीन दितात तो ‘इन्स्पायरींग गोवन बिझनेस हावस’ पुरस्कार अंदूं फोमेंतो रिसोर्सिसाक फावो जालो. फोमेंतो रिसोर्सिसाचे संचालक ज्यो लुईस हांणी मुख्यमंत्री डॉ. प्रमोद सावंत आनी व्हायब्रंट गोवाचे अध्यक्ष राजकुमार कामत हांचे हस्तुकीं पुरस्कार स्विकारलो.
राजभवनाच्या दरबार हॉलांत आयतारा सांजे वेळार व्हायब्रंट गोवाचो पुरस्कार वितरण सुवाळो आयोजीत केल्लो. मुख्यमंत्री डॉ. सावंत हांचे सयत केंद्रीय मंत्री श्रीपाद नायक, आमदार आलेक्स रेजिनाल्ड तशेंच व्हायब्रंट गोवाचे सगळे विश्वस्त ह्या वेळार हाजीर राविल्ले.
‘इन्स्पायरींग गोवन बिझनेस हावस’ पुरस्कार फोमेंतो रिसोर्सिसाक फावो जालो जाल्यार पर्यटन ब्रँडाचो पुरस्कार टाटा ग्रूप इंडियन हॉटेल्साक, ग्लोबल एक्स्पोर्टर पुरस्कार डेक्कन फायन केमिकल इंडिया प्रायव्हेट लिमिटेड, एमएसएमई एक्स्पोर्टर पुरस्कार अॅस्ट्रा काँक्रिट प्रोडक्ट्स कंपनी, उर्बादिणो खेळगड्याचो पुरस्कार पर्ल कोलवाळकार, उर्बादिणो कलाकार पुरस्कार नामनेची गायिका सोनिया सिरसाट, उर्बादिणो बिगर गोंयकार उद्देजक पुरस्कार विजय थॉमस, महिला उद्देजक पुरस्कार फिलू मार्टिन्स, जाल्यार उर्बादिणो दादलो उद्देजकाचो पुरस्कार साहील अडवलपालकार हांकां हाजीर आशिल्ल्या मानेस्तां हस्तुकीं भेटयले.
मजगतीं, गोंयच्या उद्देगांचे उदरगती खातीर राज्य सरकार पुराय यत्न करता. व्हायब्रंट गोवान गोंयांत आयोजीत केल्ले परिशदेचो गोंयांतल्या युवा उद्देजकांक व्हड फायदो जालो. नवे उद्देजक तयार करपांत व्हायब्रंट गोवाचें व्हड योगदान आसा, अशें मुख्यमंत्री डॉ. सावंत हांणी ह्या वेळार सांगलें. व्हायब्रंट गोवाचे परिशदे उपरांत रोखडोच कोरोनाचो प्रसार सुरू जालो. ताका लागून हे परिशदेचे सकारात्मक परिणाम त्या काळांत दिसले नात. आयज दोन वर्सां उपरांत ते परिशदेचे परिणाम दिसपाक लागल्यात, अशेंय मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
