भांगरभूंय | प्रतिनिधी
आतां मेरेन 2,387 प्रस्न, 8 सरकारी विधेयकां
भांगरभूंय I प्रतिनिधी
पणजी : फाल्यां सावन सुरू जावपी पावसाळी अधिवेशना खातीर 2,387 प्रस्न आयल्यांत. हातूंत 589 तारांकीत आनी 1798 अतारांकीत प्रस्नांचो आस्पाव आसा. तशेंच आतां मेरेन 8 सरकारी विधेयकां आयल्यांत, अशी म्हायती गोपांनी दिली.
विधानसभेचें पावसाळी अधिवेशन मंगळारच्यान सुरू जाता. 18 जुलय ते 10 ऑगस्ट मेरेन अधिवेशन चलतलें. अर्थसंकल्पाचेर चर्चा जावपा सयत मागण्यांचेर चर्चा जातली. बऱ्याच वर्सा उपरांत विधानसभेचें 18 दिसांचें अधिवेशन जाता. काँग्रेस, आप, गोवा फॉरवर्ड आनी आरजी हे विरोधी पक्ष एकठांय येवन सरकाराक धारेर धरतले. हाका लागून हें अधिवेशन वादळी जावपाची शक्यताय आसा.
प्रस्न सादर करपाचो सोमारा निमाणो दीस. हाका लागून प्रस्नांचो आंकडो वाडपाची शक्यताय आसा. सरकारी विधेयकांचो आंकडो लेगीत वाडपाची शक्यताय आसा. तीन दिसां पयलीं कामकाज सल्लागार समितीची बसका जाली. प्रस्नांची जाप प्रस्नोत्तर सत्रा पयलीं दिवपाची मागणी आमदारांनी केली.
दिसाक एका आमदाराक चडांत चड पांच प्रस्न विचारपाक मेळटले, अशें सभापती रमेश तवडकार हांणी स्पश्ट केलां. हें अधिवेशन 18 दिस चलतलें. अधिवेशनाचो कालावधी उणो जावचो ना, अशें आस्वासन सभापती रमेश तवडकार हांणी बसकेंत दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
