प्रशासनांत चडांत चड कोंकणीचो वापर: मुख्यमंंत्री

भांगरभूंय | प्रतिनिधी

राजभवनांत जालो गोंय घटक राज्य दिसाचो उर्बेभरीत सुवाळो

पणजी : कोंकणीक राज भाशेचो दर्जो मेळ्ळे उपरांत गोंयांक घटक राज्याचो दर्जो मेळ्ळा. प्रशासनांत कोंकणीचो चडांत चड वापर वाडोवपाक प्राधान्य दितले, अशें मुख्यमंत्री डॉ. प्रमोद सावंत हांणी सांगलें. गोंय राज्याक खऱ्या अर्थान स्वयंपूर्ण करपा खातीर सरकारान मनीसबळ आनी संसाधन विकासाचेर भर दिला. तशेंच कोंकणी भाशेंचे उदरगती खातीर खासा यत्न करतले, अशेंय तांणी सांगलें. राजभवनांतल्या दरबार सभाघरांत घटक राज्य दिसाच्या सुवाळ्यांत ते उलयताले.

गोंयाक घटक राज्याचो दर्जो मेळिल्ल्याक 35 वर्सां पुराय जाली. हे निमतान राजभवनाच्या दरबार सभाघरांत खाशेली कार्यावळ जाली. राज्यपाल पी. एस. श्रीधरन पिल्लई, केंद्रीय मंत्री श्रीपाद नायक, मंत्री, आमदार आनी हेर मानेस्त कार्यावळीक हाजीर आशिल्ले. राज्यपाल पी. एस. श्रीधरन पिल्लई आनी केंद्रीय मंत्री श्रीपाद नायक हांची ह्या वेळार भाशणा जाली. आदल्या बारा मुख्यमंत्र्यां सयत सामाजीक तशेंच सांस्कृतीक मळार योगदान दिल्ल्या संस्थांचोय ह्या वेळार भोवमान जालो.
‘केजी टु पीजी’ मेरेनचो अभ्यासक्रम कोंकणींतल्यान तयार जाला. उच्च न्यायालयाचें कामकाज लेगीत कोंकणींतल्यान जातलें. कोंकणीच्या उदरगती खातीर सरकार विवीध उपक्रम राबयतले. घटक राज्य दिसाचे कार्यावळींत हाचे मुखार दर वर्सा योगदान दिल्ले मानेस्त तशेंच संस्थांचो भोवमान जातलो. अंदूं 35 मानेस्तांचो भोवमान जाला. फुडल्या वर्सा 36 मानेस्तांचो भोवमान जातलो. नवी दिल्लींतल्या राष्ट्रीय झूज स्मारकाक भेट दिवन दरेकी राज्यांक आर्गां ओंपपाक केंद्रांन सांगलां.
गोंय राज्यान प्रत्येक मळार भरीव प्रगती केल्ल्याचें सांगून घटक राज्याच्या फाटल्या 35 वर्सांच्या काळांत सत्तेर आयिल्ल्या दरेक सरकारान राज्याचे उदरगतीक योगदान दिल्ल्याचें मुख्यमंत्र्यान म्हणलें.
आत्मनिर्भर भारत करपाचे प्रधानमंंत्री नरेंंद्र मोदी हांंचें सपन आसा. हें सपन पुराय करपा खातीर समेस्त गोंयकारांंनी योगदान दिवपाची गरज आसा, अशें मुख्यमंत्री डॉ. प्रमोद सावंत हांणी सांगलें.
गोंयांत पर्यटना खातीर साधनसुविधा उबारपी वावराची माहिती केंद्रीय मंत्री श्रीपाद नायक हांणी दिली.
ह्या वेळार माचयेर गोंय विधानसभेचे सभापती रमेश तवडकार, येरादारी आनी शिश्टाचार मंत्री माॅवीन गुदिन्हो, कृशी मंत्री रवी नायक, उदकास्त्रोत मंत्री सुभाष शिरोडकार, वीज मंत्री सुदीन ढवळीकार, पर्यटन मंत्री रोहन खंवटे, नुस्तेमारी मंत्री निळकंठ हळर्णकार, समाज कल्याण मंत्री सुभाष फळदेसाय हाजीर आशिल्ले.
सुरवातीक शिश्टाचार मंत्री माॅवीन गुदिन्हो हांणी येवकाराचे उलोवप केले.
म्हायती आनी प्रसिध्दी खात्याचे सचीव रमेश वर्मा हांणी उपकार मानले.
सुवाळ्याक आमदार, उद्देजक आनी सरकारी अधिकारी हाजीर आशिल्ले.रूपा च्यारी आनी अनंत अग्नी हांणी कार्यक्रमाचे सुत्रसंचालन केले.

आदल्या मुख्यमंत्र्यांचो भोवमान
गोंयचे उदरगतीक योगदान दिल्ले खातीर राज्यपाल पिल्लई हांचे हस्तुकीं आदले मुख्यमंत्री सर्गेस्त दयानंद बांदोडकर, सर्गेस्त श्रीमती शशिकला काकोडकर, सर्गेस्त लुईस प्रोत बार्बोझ, सर्गेस्त डॉ. विल्फ्रेड डिसौझा, सर्गेस्त मनोहर पर्रीकर हांचो भोवमान केलो. तांच्या घरच्यांनी हो भोवमान स्विकारलो. तशेंच आदले मुख्यमंत्री चर्चील आलेमांव, प्रतापसिंह राणे, रवी नायक, लुईझीन फालेरो, दिगंबर कामत हांचोय ह्या वेळार राज्यपाला हस्तुकीं भोवमान जालो.

उद्देग समूहांचो भोवमान
तशेंच राज्याचे उदरगतीक योगदान दिल्ले खातीर फोमेन्तो उद्देग समूह, धेंपो उद्देग समूह, साळगांवकर उद्देग समूह, वेदांता उद्देग समूह, चौगुले उद्देग समूह, डी. बी. बादोडकर उद्देग समूह, आग्वादा रिसॉर्ट, आरएनबी उद्देग समूह, सिप्ला कंपनी, दै. गोमन्तक, जुवारी इंडस्ट्री, मणिपाल हॉस्पिटल, रॉटरी क्लब ऑफ गोवा आनी नामनेच्या शिक्षणीक संस्थांचो ह्या वेळार मानेस्तांच्या हस्तुकीं भोवमान जालो. तशेंच 6 स्वयंपूर्ण इश्टांचोय ह्या वेळार भोवमान जालो.

15 जुलय गोंय राष्ट्रीय झूज स्मारक दीस पाळटले
पुर्तुगेज सत्ते आड जाल्ल्या कुंकळ्ळीच्या बंडाच्या उगडासाक 15 जुलय हो दीस आदरांजली दीस म्हूण पाळपाचे जाहीर केले. तशेंच दरेक वर्सा एक दीस नवी दिल्लीच्या राष्ट्रीय झूज हुतात्मा स्मारकाक भेट दिवन हुतात्म्यांक आर्गां ओंपतलें, अशें मुख्यमंत्र्यान सांगलें.

राष्ट्रीय फुडाऱ्यांं कडल्यान घटक राज्य दिसाचीं परबीं
राष्ट्रपती रामनाथ कोविंद, तशेंच प्रधानमंत्री नरेंद्र मोदी हांचे सयत सगल्या पक्षांच्या फुडाऱ्यांंनी गोंयकारांंक घटक राज्य दिसाची परबीं भेटयल्या. अस्तंंत बंंगालाची मुख्यमंंत्री ममता बॅनर्जी, दिल्लीचे मुख्यमंंत्री अरविंंद केजरीवाल, काँग्रेसीचे फुडारी राहुल गांंधी, केंंद्रीय गृह मंंत्री अमीत शाह, उपराष्ट्रपती एम वेंकय्या नायडू हांणी गोंय घटक राज्य दिसाची परबीं भेटयल्या.