भांगरभूंय | प्रतिनिधी
फाटल्या कांय दिसां सावन वीज खात्याच्या स्मार्ट मिटराचें प्रकरण धुमसता. सध्या तें न्यायालयांत आसा. केंद्रीय धोरणा प्रमाण, सगल्या राज्यांनी स्मार्ट मिटर बसयतात. देखून गोंयांत ते बसोवपाची प्रक्रिया कशीच रद्द जावची ना, अशें खात्याच्या कार्यकारी अभियंत्यान सांगलें. वेंचणुको पांच ते स म्हयन्यांचेर पाविल्ल्यान सरकार ही प्रक्रिया मुखार व्हरपाक सोदिना. ती स्थगीत दवरल्या. मात ती कायमची रद्द करची काय ना, हें सरकार थारायतलें. अतिरिक्त वीज (एक्सेस वा एडिशनल लोड) वापरप्यांक घाल्लो दंड माफ करपाचो निर्णय सरकारान घेतला. आतां मेरेन सात लाखांतल्या 70 हजार गिरायकांक 43 कोटी रुपया दंड घाला, तो माफ करतले. ताची अधिसुचोवणी आयज येवंक शकता. सरकारान एक लाख स्मार्ट मिटर घेतल्यात, तातूंतले 45 हजार बसयल्यात, अशें मुखेल वीज अभियंत्यान सांगलें. काल काँग्रेसीचें आंदोलन जालें. ते म्हणटात, मिटर बसोवपाची प्रक्रिया रद्द करची आनी अतिरिक्त लोडाचो दंड माफ करचो.
स्मार्ट मिटर हो वीज यंत्रणा आधुनीक करपाचें एक उपकरण. तरीय लोकांचो इतलो विरोध कित्याक? हो विशय अर्थीक आनी राजकी जाला. सादारण 750 कोटी रुपयांचो हो प्रकल्प खंय. हो मिटर रियल टायम वीज वापराची नोंद दवरता. मिटर रिडराची गरज ना. व्होल्टेज, करंट आनी हेर म्हायती मेळटा. वीज चोरी सोदप सोंपें जाता. (वीज चोराक ख्यास्त दिवप काय ताका निर्दोश सोडप हो उपरांतचो प्रस्न), फाॅल्ट खंय आसा तें सोदपाक मेळटा. प्रिपेड वा पोस्ट पेड बील लागू करपाक मेळटा. पूण प्रिपेड केलें आनी लायट चड वापरली जाल्यार ती बंद जावं येता खंय. आयज प्रत्येक गजालीक वीज लागता, म्हणटकच ही मुखार समस्या थारपाक येता. वीज खातें म्हणटा, बील अचूक येतलें. सद्दां मोबायल अॅपाचेर युनिट्स दिसतले. लोड वेवस्थापन सुदारतलें. चोरी उणीं जाल्ल्यान वीज वितरण कंपनींचें लुकसाण उणें जातलें.
सध्या लोकांचो कित्याचेरूच विस्वास बसना जाला. नोव्हेंबरांत 1300 ते 1500 मेरेन वीज बील येतालें, ताका 1800 तें 2100 रुपया बील येवपाक लागलां. तातूंत कर, अधिभार. स्ट्रीट लायटीचे पयशे पसून लोकांच्या बोल्सांतल्यान वतात. उणीच 500 रुपया वाड जाल्या. लोकांक दिसता – प्रीपेड रिचार्ज सोंपल्यार वीज रोखडीच बंद करतले, वीज बील आनीक वाडटलें, तंत्रीक इबाड जाल्यार गिरायक त्रासांत पडटलें, पोरणें डिजिटल मिटर बेसबरे चलतना नवे बसोवपाची गरजूच कितें? सध्या 24 वरां अखंड वीज मेळना. व्होल्टेज हालता. कांय कडेन लायट गेली काय वर- देड वर येना. दरवर्सा दरवाड जाता, सेवा मात आसा तशीच, अशे खोटलोभर प्रस्न लोक विचारपाक लागल्यात. स्मार्ट मिटर संवसारांत बऱ्याच देशांनी वापरतात. ताचो फायदो वीज वितरण कंपनींक जाता. अखंड वीज पुरवण, पारदर्शक बील, बरी सेवा मेळ्ळ्यार गिरायकांचो विरोध उणो जातलो.
लायटीचें बील कमी जायत जाल्यार लोकांचो ह्या मिटरांक जावपी विरोधूय उणो जातलो. वीज कनेक्शन घेतना डिपाॅझीट घेतात. ते नव्यान भरचें अश्यो नोटिसो फाटीं आयिल्ल्यो. मात उपरांत त्यो फाटीं घेतल्यो. अशें अदीं मदीं कितें जालें काय लोकांच्या मनांत अविस्वास निर्माण जाता. विरोधाचें हें एक कारण. आम आदमी पक्षाचें सरकार पंजाबांत म्हयन्याक 300 युनीट मुफत दिता. म्हणजे दरेका कुटुंबाचे सादारण 2500 ते 3000 रुपया माफ करपाक सारके. हेर कांय राज्यांचे तुळेन गोंयचे विजेचे दर उणें आसात. म्हणटकच चडश्या लोकांचो दरा परस खंडीत जावपी वीज, व्होल्टेज आनी हेर गजालींक विरोध आसतलो!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
