भांगरभूंय | प्रतिनिधी
पणजी: प्रधानमंत्री नरेंद्र मोदी हांणी जाहीर केल्ल्या प्रधानमंत्री विश्वकर्मा येवजणेच्या अंमलबजावणे खातीर राज्य सरकार सक्रीय जालां. हे विशीं म्हायती तंत्रज्ञान, पंचायत, नगर विकास, कुशळटाय विकास उद्देग तशेंच हस्तकला खात्याच्या अधिकाऱ्यांक येवजणेची कार्यवाही करपा खातीर सुचोवणी केल्या.
प्रधानमंत्री नरेंद्र मोदी हांणी स्वातंत्र्यदिसाच्या भाशणांत विश्वकर्मा येवजणेची घोशणा केल्ली. ते प्रमाण परंपरीक हस्त कलाकार तशेंच कारागिरांक उण्यां कळंतरान 1 ते 2 दोन लाखांचें रीण मेळटलें. तशेंच तांकां कुशळटाय विकासाचें प्रशिक्षण, डिजिटल वेव्हारांत उर्बा तशेंच तांचे उत्पादन विकपाक मजत करतले.
येवजणेच्या पयल्या टप्प्यांत 18 परंपरीक कारागिरांचो आस्पाव आसा. सुतार, लोहार, सोनार, कुंभार, मूर्तिकार, चांभार, धोबी, न्हावी, शिंपी, विणकार, परंपरीक बावल्यो तयार करपी, मिस्त्री, फुलांच्याे माळाे तयार करपी, नुस्तेमारी जाळ तयार करपी हांचो आस्पाव आसा. येवजणे खातीर सुमार 13 हजार कोटींचो खर्च अपेक्षीत आसा.
येवजणेचो फायदो घेवपाक 18 परंपरीक वेवसाय आनी आपरोजगार करपी आसप गरजेचें. येवजणे प्रमाण रीण घेवपाक पात्र थारपाक केंद्राच्या हेर कसल्याच येवजणेंतल्यान फाटल्या पांच वर्सांत रीण घेतिल्ले आसूंक जायना. ही नोंदणी आधार बायोमेट्रीक पद्दतीन आसतली.
सरपंच, पालिका अध्यक्ष करतले पडताळणी
व्यक्तीची सरपंच वा नगरपालिका अध्यक्ष पडताळणी करतले. उपरांत जिल्हो अंमलबजावणी समिती कडल्यान ह्या नांवांची छाननी जावन ती समिती कडेन धाडटले. छाननी पुराय जाले उपरांत अवजार प्रोत्साहन सहाय्य म्हूण 15 हजार रुपया दितले. तांकां कुशळटायेचें प्रशिक्षण दितले. ह्या काळांत तांकां 500 रुपया मानधन दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
