भांगरभूंय | प्रतिनिधी
खंयच्याय रस्त्यार पावल दवरात, पणजेंत येरादारीची कोयंडी सदचीच. आदीं फक्त 18 जून रस्त्यार आसताली, आतां आत्माराम
बोरकार रोड आनी मुष्टीफंडाच्या रस्त्याचेंय तेंच. पाट्यार सावन महात्मा गांधी मार्गच कित्याक गोंय पुलीस मुखेल कार्यालय, भाटेंच्या वर्षा बुक स्टाॅला कडलो रस्तो, दयानंद बांदोडकार मार्ग, उत्तर जिल्लोधिकारी कार्यालयच न्हय जाल्यार पणजे मार्केटा कडले मार्गय उद्येगी, कार्यमग्न जाल्यात. नवनिर्मणे कडेन वचपी पणजेंत शेंकड्यांनी नळ्यांची घरां, नामना जोडिल्ल्यो बेकरी, पुस्तकांचीं दुकानां, वाचपघरां आसात. पणजेत येतल्यांची, पणजे भायर वचप्यांची पावलां आपसूक थंय पावतात, वर्तमानपत्रां, पुस्तकां, केक्स, पेस्ट्रीज, पॅटिस, बिस्कीटीची खरेदीय जाता.
बसस्टँडावेलो गोमंतक, सांतिनेजचें ब्राॅड वे बुक सेंटर, मेरी इमेक्युलेट इगर्जे कडल्या सिंगबाळ घराब्याचें पुस्तकांचें दुकान, विस़डम बुक स्टाॅल, क्राॅसवर्ड आदीं पुस्तकाचीं दुकानां, म्हापालिकेचें वाचपघर, बुक स्टाॅलांत पुस्तकांची, वर्तमानपत्रांची गर्दी शाळेंतल्या भुरग्यां वरी. कला आनी संस्कृती भवनांतली पयलींच्या पणजी पुलीस ठाण्या कडेन मिनेझिस ब्रागांझा संस्थेच्या बिल्डिंगेत आशिल्ली सेंट्रल लायब्ररी, 31 जानेवारी बेकरी लागसाल्लें महालक्ष्मी वाचपघर, ई वाचनालयां जावन वाचप्यांक घरां बशिल्ले कडेन गिन्यान दितात. पयलींच्या महात्मा गांधी मार्गावेलें आतांचे 18 जून मार्गा वेलें सरस्वती वाचनमंदिर आयजूय ज्ञानमंदिरच आसा. पणजेंतल्या सेंट्रल लायब्ररीक इ सुविधेन ही वाचपघरां जोडपाची आदले मुखेलमंत्री मनोहर पर्रीकर हांची येवजण आशिल्ली व्हय? पुस्तकमोगी मनोहरबाब वाचनाक उर्बा दिवपाक पुस्तकांचो उत्सव घडोवन हाडपी. पुस्तकां वांगडाच भांगरमोगी गोंयकारां खातीर मुंबय, पुण्याचे वामन हरी पेठे, पु. ना. गाडगीळ, लागू बंधू आनी चिंतामणीज, तनिष्काकय मनोहरबाबांन पणजेंत हाडले. सिदाद द गोवा, नोवा गोवा हाॅटेलां तर भाजपाचींच जाल्लीं तातूंतल्यान विवांता, मेरियट घडलीं. आजय दर्यांतच आशिल्ल्या समुद्री वस्तुसंग्रहालयाचेर आवाज उठयतना धर्तरेर नखेत्रांचो संवसार हाडपी सायन्स सेंटरय तांच्याच तेंपावेलें. आशीकुशीचें शारदेचें मंदीर, क्लब टेनीस द गास्पार डायस आधुनिक करतना राजभवनार वचपाक दुसरो रस्तो जालो तो दोनापावला श्यामाप्रसाद मुखर्जी स्टेडियमा मेरेन पावलो. नवनिर्मणेंतली कला अकादमी मनोहरबाबांच्या सपनातलें इफ्फीचें घर जायत व्हय?
अटल सेतूची निर्मणी फकत म्हापशें स्मार्ट सिटी पणजेकच न्हय जाल्यार मजगतींच्या गोंयांतल्या वाठारांक, दक्षिण गोंय उत्तरेक जोडपी. नव्या प्री कास्ट तंत्रगिन्यानांतल्यान बांदिल्लो अटल सेतू आनी नवे झुआरी, खांडेपार पूल उत्तर पूर्वेक जोडपी बुंदेलखंड पुला वरीच. नव्या बुंदेलखंड रस्त्याक व्हड फोंडकुल पडलें तेन्नाच गिरी म्हापशेंचो रस्तोय खचलो. आदले प्रधानमंत्री अटलबिहारी वाजपेयी हांच्या सुवर्ण चतुष्कोनान गोंयांक दिल्ली, आंध्र प्रदेस, कर्नाटक, महाराष्ट्र राज्यां लागीं आयलीं. ओडिशाचे द्रौपदी मुर्मुक राष्ट्रपतीपदा मेरेन व्हरतना गोंय उत्तर प्रदेस, मध्य प्रदेसाच्या म्हऱ्यांत बसत व्हय? तशें अस्तंत बंगाल पयस आसाच, पूण उंचेल्या पदांचेर कंत्राटी पद्धतीन नियुक्त्यो करपी राष्ट्रीय समुद्री विज्ञान संस्थाय पणजेंत आसा. हे संस्थे वरीच पाटो प्लाझार केंद्रीय आस्थापनां आसात, कायमस्वरुपी कर्मचारीवर्ग आसा व्हय ह्या आस्थापनांनी, पोस्ट आॅफिसांत?
कामगारमंत्री पणजेचे आमदार ते राज्य सरकाराच्या कर्मचाऱ्यांची म्हायती मेळवपाचे आसात. तेन्नाच तांणी केंद्रीय आस्थापनांनी आशिल्ल्या कामगारांची म्हायती मागोवची आनी कारवाय करची. सांतिनेज व्हाळ नितळ करपाचें आव्हान तांणी घेतलें, व्हाळाची नितळसाण बरी जाल्या. गरज आसा व्हाळ प्लास्टिकमुक्त करपाक स्मार्ट सिटी खातीर इमेजिन पणजी आराखडो बांदतना केल्ली येवजण चालीक लावपाची.
पणजे आठ मजली बिल्डिंगो आसात, कांय बिल्डिंगेची पळोवणी करून सरकारी दायज घरां येवजणेतल्यान वेंचणुके आदीं पणजे नवनिर्मणी केल्या. कोंकणी अकादेमी, फार्मासी म्हाविद्यालयाक, जुन्ता हावसाक, मळ्यांतल्या घरांक हे येवजणेचो लाव मेळत व्हय? गीता बेकरी आशिल्ले बिल्डिंगेक जीव दिल्यार अर्थकारणाचें नवें दार उक्तें जातलें. कॅफे सेंट्रलान सांगोल्डा मेरेन उडी मारल्या, एकादरे मोपा मेरेन तें वतलेंच. पेस्ट्री पॅलेस, पेस्ट्री काॅटेजाक मोपा मेरेन वचपाची वाट मेकळी आसा.
पणजेनय आयआयटीयन अनिल खंवटे हांचेवरी उद्येजक देसाक दिल्यात. तांच्या बापायचें ल्हानशें पुर्तुगीज तेंपावेलें सुयो विकपाचें दुकान पणजें म्हापालिका इमारत प्रकल्पांतलें. तांचे पूतय उद्येजक जाल्यात, सिमेंट काँक्रिटाचो तांचो प्लान्टय आसा. तांचे वरी नामनेचे उद्येजक, डाॅ. श्याम भांडारे, डाॅ. रुफीन मोंतरो, डाॅ. आॅस्कर रिबेलो , डाॅ. रतन खंवटे, डाॅ. सुधा वेलिंगकार हेय पणजेतल्यान उंचेल्या पावंड्यार पावल्यात.
म्हापालिका इमारतीचो वाठार वर्सा भितर नवनिर्मणेत व्हरपाची तांक आशिल्ले इंजिनियर, आर्किटेक्ट पणजेंतच न्हय जाल्यार गोंयांत विखुरिल्ले आसात. मूळ तशेंच दवरून म्हापालिका इमारतीच्या लागसल्ल्या वाठाराक नवें रुप दिवपाच्या वावराक पणजेच्या आमदारांनी हात घालतना पाटो प्लाझार आशिल्ल्या इमारतींनी कितें चलता, कितलो जागो रितो आसा ताचो सोद घेतल्यार सरकारी कार्यालयां खातीर एकादरी रेडीमेड इमारतय तांकां कित्याक मेळची न्हय? हांतरूण पळोवन पावल मारपाची मुख्यमंत्री डाॅ. प्रमोद सावंत हांणी विधानसभेंतली भास तोखणायेची. तेच वाटे वेल्यान गेल्यार गोंय महासत्ता, स्वयंपूर्ण जावप शक्य आसा.
इमेजिन पणजेंत विसव घेतना परतून मनोहरबाबाचें सपन फुडें व्हरपी पणजेंतलो नवो कांपाल पाॅयंट (दुसरो नरीमन पाॅयंट ) मुख्यमंत्र्यांक 15 आॅगस्टाच्या ध्वजवंदनेक आपोवणे दित व्हय? मुख्यमंत्र्यांच्या नावांच्यो पाट्यो त्या पाॅयंटार आसाच. त्या पाॅयंटा वेल्यान मांडवींतली म्हादयमाय दिसतली, सुटके झुजाच्यो कुरवोय दिसतल्यो, निळें निळें मळब तांकां दिसतलें, थाकाय आयिल्ल्या तना मनाक शांतीकाय मेळटली.
सुहासिनी प्रभुगावकर
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
