भांगरभूंय | प्रतिनिधी
भांगरभूंय प्रतिनिधी
कुडचडेंः पोंगिरव्हाळ- काकोडें हांगच्या शायनींग स्टार खेळ आनी सांस्कृतीक क्लबाच्या 39व्या वर्धापन दिसाच्या निमतान आयोजीत केल्ले कार्यावळींत समाज वावर ह्या विशयांत इंदिरा गांधी मुक्त विद्यापिठाची पीएचडी मेळयल्ल्या सर्वानंद सावंत देसाय हांचो कुडचड्याचो आमदार आनी बांदकाम मंत्री नीलेश काब्राल हांचे हस्तुकीं भोवमान केलो.
सर्गेस्त तुकाराम सावंत देसाय मैदानार आयोजीत केल्ले हे कार्यावळींत शायनींग स्टार क्लबाचो ज्येश्ठ वांगडी गुरुदास फुलारी हांचोय काब्राल हांणी भोवमान केलो. ह्या वेळार माचयेर समाज वावुरपी गुरूदास शेळवणकार, क्लबाचो अध्यक्ष राजेश वस्त आशिल्लो. नीलेश काब्राल हांणी शायनींग स्टार क्लबाच्या वेगवेगळ्या वावरा खातीर तांची तोखणाय केली. कार्यावळीचे सुरवेक क्लबाचे संस्थापक अध्यक्ष राजाराम वस्त, विनोद शट्टिगर आनी विलास बुक्कम हांकां आर्गां ओपलीं.
1983 सावन शायनींग स्टार क्लबांतल्यान सुरू केल्ल्या समाज वावरांतल्या अणभवांतल्यान समाज वावर विशयांतल्यान बीएसडब्ल्यू, एमएसडब्ल्यू आनी पीजीडीएसडब्ल्यू पदव्यो मेळटकूच पीएचडी पदवी मेळयली. हाचें पुराय स्रय शायनींग क्लबाक आपूण दितां अशें डॉ सर्वानंद सावंत देसाय हांणी सांगलें. क्लबाच्या वर्धापन दिसा निमतान सर्गेत तुकाराम सावंत देसाय कुटुंबा वतीन सत्यनारायण पूजा केली. ते उपरांत म्हाप्रसाद जालो.
कार्यावळींत पोंगिरव्हाळ वाठारांतल्या हुशार विद्यार्थ्यांचो भोवमान केलो. तातूंत सिद्धांत वस्त, भैरवी सावंत देसाय, चंद्रेश्वर मोपीदेवी आनी लक्ष्मी मोपीदेवी हांचो आसपाव आशिल्लो. “भविष्यायो रोग आणी जाणटेपणात मोग” ह्या कोंकणी नाटकांच्या सादरीकरणान वर्धापन दीस कार्यावळीचो समारोप जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
