पावसाळी अधिवेशनांत सरकारानकूळ- मुंडकार प्रश्न मार्गाक लावचो गोंय कूळ- मुंडकार संघटनेची मागणी

भांगरभूंय | प्रतिनिधी

भांगरभूंय । प्रतिनिधी
म्हापशेंः कूळ आनी मुंडकारांचीं कितलींशींच प्रकरणा न्याय दंडाधिकाऱ्यांच्या कार्यालयांनी पडून आसात. राज्य सरकारान 1964-65 वर्सा कसता ताची जमीन आनी रावता ताचें घर हो कायदो पास करून गरीब कूळ आनी मुंडकारांक थाकाय दिली. मात हो कायदो अजून कागदाचेरूच आसा. सरकारान येता त्या पावसाळी अधिवेशनांत ह्या कायद्याची अंमलबजावणी करून कूळ- मुंडकारांक न्याय मेळोवन दिवचो, अशी मागणी गोंय कूळ आनी मुंडकार संघटनेच्या बार्देश आनी पेडणे फाट्यांनी केल्या.
संघटनेचो उपाध्यक्ष संजय बर्डे आनी निमंत्रक दिपेश नायक हांणी बार्देशाचो उपजिल्होधिकारी गुरूदास देसाय हांका हे संबंदीचें निवेदन भेटयलें. ह्या वेळार अनिल केरकार, राजेंद्र धारगळकार, सितेश मेरो, रामदास मोर्जे, मोतिराम नागवेकार आनी लक्ष्मण बर्डे हाजीर आशिल्ले. हालींसाराक पर्यटन खात्या वरवीं शेत जमनी तशेंच कोमुनिदादीच्यो जमन 99 वर्सांचे कबलातींचेर आपले सोयरे वा व्हडल्या उद्देजकांक दिल्यात. सध्या त्यो गोंयां भायल्यांच्या हातांत वचपाक लागल्यात आनी आमीं कांय करपाक शकनात अशें बर्डे हांणी पत्रकारांक सांगलें.
पोर्तुगिजांनी भाटकारशाय तयार केली. ताका लागून व्हडल्यो जमनी अजून तांच्या नांवार आसात. जायते जाण विदेशांत वचून रावल्यात, मात तांणी कूळ- मुंडकारांक जमनीचो हक्क दिल्लो ना. तांची नांवां अजूनय एक चौदा आनी डी फॉर्मांत मालकी हक्क सांगतात. ताका लागून कोणाकूय ना हरकत दाखलो जाय जाल्यार कूळ- मुंडकारांक भाटकाराची मर्जी सांबाळच पडटा अशें तांणी सांगलें.
कूळ- मुंडकरांची ही समस्या सुटावी करपा खातीर विधानसभेंत मुख्यमंत्री डॉ प्रमोद सावंत आनी कृशी मंत्री रवी नायक हांणी कायदो चालीक लावचो आनी कूळ- मुंडकारांक न्याय मेळोवन दिवचो अशी मागणी बर्डे हांणी केल्या.
श्रीपाद नायक निश्क्रिय
उत्तर गोंयांतल्यान फाटल्या 25 वर्सां सावन श्रीपाद नायक हें केंद्रांत गोंयकारांचें प्रतिनिधीत्व करतात. मात कूळ- मुंडकारांचो हो प्रश्न सुटावो करून गरीब लोकांक न्याय मेळोवन दिवपाचें काम तांच्या हातांतल्यान अजून जालें ना. खासदार म्हणून फाटले पांच कार्यकाळांत तांणी लोकांची फटवणूक केल्या. ते निश्क्रिय आसात अशें संघटनेचो निमंत्रक दिपेश नायक हांणी सांगलें.