भांगरभूंय | प्रतिनिधी
पोरूंचे तुळेंत 33 दीस आदीं 100 इंच पावसाची नोंद
भांगरभूंय । प्रतिनिधी
पणजी : ऑगस्टांत पावसाचो नेट सामकोच उणो जालो तरी लेगीत सरासरीच्या 16 दीस आदींच पावसान इंचांचो शेंकडो हुपला. पावसान इंचांचो शेंकडो बेगीन हुपपाचो विक्रम केलो, अशें मात म्हणपाक जावचें ना. दोन वर्सां पयलीं 2020 त 5 ऑगस्टाक इंचांचो शेंकडो पुराय जाल्लो. 2019 त 6 ऑगस्टाक इंचांचो शेकडो पुराय जाल्लो. 2021 त 29 ऑगस्टाक 100 इंच पावस जाल्लो. 2022 त मात पावसाक शेंकडो हुपपाक कळाव जालो. 11 सप्टेंबराक पावसान 100 इंचांचो आंकडो मेळयिल्लो.
सरासरीचो विचार केलो जाल्यार मॉन्सून 22 ऑगस्टाक इंचांचो शेंकडो हुपता. पोरूंचे तुळेंत अंदूं 33 दीस पयली पावसान इंचांचो शेंकडो मेळयलो. हाका लागून अंदूं पावसाचें प्रमाण चड आसा, अशें म्हणपाक हरकत ना.
जुलय सोंपपाक 97 इंच पावस जाल्लो. ऑगस्टांत मात पावसाचें प्रमाण सामकें उणें जालें. दिसांतल्यान पावसाच्यो एक वा दोन दडको पडटात, एकसारको पडत रावना. हाका लागून अंदूं शेंकडो हुपपाक मातसो वेळ जालो. 27 जुलयाक 23.1 मिमि पावसाची नोंद जाल्ली. हाचे उपरांत पावस उणो जायत गेलो.
अंदूं मॉन्सून 11 जूनाक पाविल्लो. उपरांत पावसान सामकी दांडी मारली. 23 जून मेरेन पावसूच नाशिल्लो. 23 जूना उपरांत सुरू जाल्ल्या पावसान मात सामके धुमशेण कांडलें. एकूय दीस चुकय नासताना सदांच हाजेरी लायत ताणें उणाव भरून काडलो. आतां 2543.4 मिमि म्हणल्यार 100.13 इंच पावस जाला. 28 जूनाक 142.5 मिमि (5.61 इंच) पावस पडलो. सरासरी परस पावसाचें प्रमाण 18.1 टक्के चड आसा. दर वर्सा उत्तर गोंयांत पावस पड पडटा. हे खेपे उत्तर गोंया परस दक्षीण गोंयांत चड पावस पडला. सांगें, केपें, मडगांव, वाळपय, फोंडें, पेडण्या आदींच इंचांचो शेंकडो पुराय जाला.
इंचांचो शेकडो
2023 – 6 ऑगस्ट
2022 – 11 सप्टेंबर
2021 – 29 ऑगस्ट
2020 – 5 ऑगस्ट
2019 – 6 ऑगस्ट सरासरी – 22 ऑगस्ट
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
