भांगरभूंय | प्रतिनिधी
अंदूं समाधानकारक आनी सरासरी परस चड पावस पडटलो असो अदमास भारतीय हवामान खात्यान उक्तायला. गोंयांत
जूनाची पयली पंद्रस सुकी गेली. उपरांत पावस सुरू जालो. फाटले आठ दीस उटंगाराचो पावस पडटा. कोंकण, गोंयांत नेटाचें वारेंय व्हांवलें. मे म्हयन्यांत महाराष्ट्रांत कांय कडेन बरो पास पडलो. गोंय, कोंकण आनी मुंबयंत सद्या पावसाचीं धुमशेणां चालू आसात.
महाराष्ट्र, कर्नाटकाच्या कांय वाठारांनी फाटलीं बरींच वर्सां पावस नाशिल्ल्यान तशेंच कांय कडेन तो सामको उणो पडिल्ल्यान दुकळाची परिस्थिती निर्माण जाल्ली. खास करून विदर्भ, मराठवाड्यांत तर उदकाचो व्हड उणाव आशिल्लो. नागरिकांक उदका खातीर एक किलोमीटर चलत वचचें पडलें. उदका खातीर दाही दिका …. अशी लोकांची अवस्था जाल्ली. अशा वेळार हवामान खात्यान अदमास केल्ली परिस्थिती थाकाय दिवपी आसा.
अंदूं सरासरी परस चड पावस पडटलो म्हणून पावसाच्या उदकाचो नाश जावचो न्हय हाची जतनाय आमकां दरेका नागरिकाक घेवची पडटली. कोंकण, गोंय, कर्नाटकाची दर्यादेग हांगा खूब पावस पडटा. देखून आमकां कित्याक उदक सांठोवन दवरूंक जाय, आमकां उदक कित्याक जमनींत जिरोवंक जाय, अशें सगलेच कोंकणी मनीस म्हटणात. पूण पावसाचें उदक जिरपाक जाय, अशें म्हाका दिसता. कांय कडेन दोंगराचेर चर मारून हें उदक जिरयतात.
पावसाचें चडांत चड उदक वाटोवपा खातीर आतां सावन नियोजन करचें. जमनीचेर पडपी पावसाच्या उदकाचें योग्य नियोजन जावंक नाशिल्ल्यान खूब उदक फुकट वता. उणो पावस पडटा त्या वाठारांनी तर हो उदकाचो नाश अशेंच मानतात. पावसाचो विचार करून उदक घेवप आनी उदक सांठोवप अशीं दोन तंत्रां जाय. उदक सांठोवपा परस उदक सांबाळपाचो फायदो म्हळ्यार भूंयगत उदकाचें बाश्पीभवन जायना आनी तें आटना. उदकाचें वेवस्थापन म्हणल्यार फकत धरण बांदप, शारांत नळ व्हरप आनी घरांघरांक उदक पावोवप हें न्हय. उदकाचें वेवस्थापन म्हळ्यार समाज आनी उदक हांचे मदीं संबंद स्थापन करपाचो यत्न करप, उदकाच्या दर एका थेंब्याच्या म्हत्वाचेर भर दिवप.
पावसाचें उदक फुकट वचचें न्हय म्हणून शाळा आनी म्हाविद्यालयांतल्या विद्यार्थ्यांक उदकाचें कशें वेवस्थापन करचें हाचेर मार्गदर्शन करुंक जाय. निदान तातूंतलीं 20 टक्के भुरगीं तरीं उदक वाटावपाक लागलीं तरी खूप जालें. नागरिकांकय हे बाबतींत जागृत करपाक जाय. न्हंयो, बांय, तळीं आनी धरणांनी पावसाचें उदक चडांत चड कशें सांठोवप हाचें नियोजन सरकारी पांवड्यार करचें. जंय पावस चड पडटा तांणीय हें उदक सांठोवपाक, जिरोवपाक जाय. म्हणटकच मार्च म्हयन्यांत बांयों सुकतात, त्यो सुकच्यो नात. न्हंयो, तळयो भरिल्ल्यो उरतल्यो. विशेश म्हणल्यार पावसाच्या उदकाचो वापर जाल्ल्यान नळाचें उदक कमी लागतलें आनी साहजिकूच बिल कमी येतलें. पयशांची बचत जातली.
पावसाचें उदक वाटोवपा खातीर नागरिकांनी गरजेचे सगळे यत्न करचे. नागरिकांनी आपल्या घरांतूंच न्हय तर शेजाऱ्या पाजाऱ्यांक पावसाचें उदक एकठांय करपाची पद्दत शिकोवची. शाळा, म्हाविद्यालयां आनी सगल्या सरकारी कार्यालयांनीय पावसाचे उदक सांठोवपाची वेवस्था करची. पावसाचें उदक एकठांय करप म्हळ्यार दर एका घरान, समाजान, खाजगी, सरकारी कार्यालयांनी उदकाची बचत करप. ते खातीर खाशेली वेवस्था करून मेळटा. कांय कडेन घरापोंदां टाकी करून तें उदक सांठयतात. मागीर बाग शिंपपाक, गाडी धुंवपाक तें वापरतात. लोकांनी खंयचेच परिस्थितींत उदक फुकट वच्चें न्हय हाची जतनाय घेवची. उदकाचो एक- एक थेंब म्हत्वाचो. कारण उदक वाटावप म्हळ्यार उदकाचें उत्पादन. तें तयार जावपाक वेळ लागता म्हणून उदक वाटोवप हें सगळ्यांचें कर्तव्य. सैम आमकां आयतें उदक दिता. पूण चडशें दर्यांत व्हांवन वता. हें कितले दीस चलतलें?
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
