भांगरभूंय | प्रतिनिधी
भारतांत रोजगाराच्यो जायत्यो संदी तयार जातात
पणजी : पर्जळीत फुडार घडोवपाचे आसत जाल्यार शिक्षणा बगर पर्याय ना, हें मतींत घेवनूच गोंयचे पयले मुख्यमंत्री भाऊसायब बांदोडकार हांणी शिक्षणाक व्हड म्हत्व दिल्लें. सध्या भारतांत रोजगाराच्यो जायत्यो संदी तयार जायत आसून, तरणाट्यांनी त्या संदींचो लाव घेवचो, असो उलो नामनेचे गोंयकार शास्त्रज्ञ रघुनाथ माशेलकार हांणी केला.
आदले मुख्यमंत्री भाऊसायब बांदोडकार हांच्या 50 व्या पुण्यतिथी निमतान शेनवारा पणजे जिमखाना सभाघरांत आयोजीत विशेश व्याख्यानांत ते उलयताले. ह्या वेळार मुख्यमंत्री डॉ. प्रमोद सावंत, शिक्षण सचीव प्रसाद लोलयेंकार हांचे सयत हेर मानेस्त हाजीर अाशिल्ले.
स्वतंत्र गोंयचे पयले मुख्यमंत्री भाऊसायब बांदोडकार हांणी शिक्षणा खेरीत पर्याय नाशिल्ल्याचे मतींत घेवन शिक्षणाक प्राधान्य दिले. ताचो फायदो फुडल्या जायत्या पिळग्यांक जालो. तातूंतल्या जायत्या जाणांनी उच्च पदार काम केलां, अशें माशेलकार हांणी म्हणलें.
सध्या भारताची जायत्या क्षेत्रांत उदरगत जायत आसा. 2016 त देशांत फक्त 471 स्टार्टअप आशिल्ले. सात वर्सां उपरांत आयज तांची संख्या 9 हजारा परस चड जाल्या. गोंया सयत देशभरांतल्या
तरणाट्यांक दर्जेदार रोजगाराच्यो जायत्यो संदी भारतांत उपलब्ध आसात. ताचो तांणी लाव घेवपाक जाय, अशेंय माशेलकार हांणी नमूद केले.
भाऊसायबांचे कार्य फुडले पिळगे मेरेन पावयतलेः मुख्यमंत्री
-गोंयचे पयले मुख्यमंत्री भाऊसायब बांदोडकार हांच्या 50 व्या पुण्यतिथी निमतान फुडले वर्सभर राज्यांत विवीध कार्यावळींचे आयोजन केलां.
– गोंय महाराष्ट्रांत विलीन जातलो, अशी संभ्रमावस्था तयार जाले उपरांत जनमत कौल घेतलो. थाराव घेवन भाऊसायबांक गोंय महाराष्ट्रांत विलीन करपाक मेळटा आशिल्लें, पूण तांणी तशेंच करूंक ना. गोंयचे अस्तित्व जपलें.
– राज्याच्या उदरगतीची बुन्याद घालपी भाऊसायबांचे कार्य फुडले पिळगे मेरेन पावावोपाक विवीध मानेस्तांच्या व्याख्यानांचे आयोजन करतले आनी त्या माध्यमांतल्यान भाऊसायबांनी सामाजीक, सांस्कृतीक, शिक्षणीक, उद्देगीक ह्या क्षेत्रांत केल्ली उदरगत लोकां मेरेन पावयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
