भांगरभूंय | प्रतिनिधी
राजभवना वतीन कलाकारांक मेळटलो व्हड आधार
पणजीः गोंयांतल्यो ना जायत चलिल्ल्यो परंपरीक कला आनी कलाकारांक उर्बा दिवपा खातीर गोंय राजभवना वतीन नवी येवजण सुरू केल्या. येवजणे खाला राज्यपाल विवेकाधीन निधींतल्यान कलाकारांक अर्थीक मजत दितले. येवजणेची पुराय म्हायती राजभवना वतीन बेगिनूच लोकांक कळीत करतले.
राज्यपाल पी. एस. श्रीधरन पिल्लई हांच्या पदाक दोन वर्सां पुराय जाल्ल्याचे निमतान राजभवनान शेनवारा ही येवजण जाहीर केली. गोंयाक कला आनी संस्कृतीचें समृद्ध दायज लाबलां. कला संस्कृतीक लागुनूच गोंयची विवीधताय कायम तिगून आसा. हातूंत परंपरीक वेवसायांचो व्हड वांटो आसा. राज्यांतले जायते परंपरीक वेवसाय जायत्या वर्सां पसून तिगून आसात. पूण सध्याच्या बदलत्या काळांत हे परंपरीक वेवसाय ना जावपाच्या मार्गार आसात. ते खातीर ह्या वेवसायांक उर्बा दिवन कलांचे राखण अानी संवर्धन करप गरजेचें. ते खातीरूच राजभवना वतीन नवी येवजण राबोवपाचे थारलां, अशें राज्यपाल पिल्लई हांणी सांगलें.
हाचे पयलीं बिगर सरकारी संस्था, दुयेंतींक दिल्लो आधार
गोंयच्या इतिहासांत पयलेच खेपे राज्यपाल पिल्लई हांणी 14 म्हयने पुराय गोंयची यात्रा करून विवीध बिगर सरकारी संस्था तशेंच गंभीर दुयेंस आशिल्ल्या दुयेंतींक राजभवना वतीन 2.75 कोटी रुपयांची अर्थीक मजत केल्या. राज्यपालांच्या त्या पुराय गोंय यात्रेची गोंयकारांनी तोखणाय केल्ली. ते उपरांत राज्यपालांनी आतां परंपरीक वेवसायांक उर्बा दिवपाक नवी येवजण जाहीर केल्ल्यान जायत्या कारागिरांक व्हड अाधार मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
