भांगरभूंय | प्रतिनिधी
गटबाजीक ओतो; राजकी फुडाऱ्यांच्या आशिर्वादा खातीर धांवपळ
भांगरभूंय । प्रतिनिधी
वाळपयः 10 ऑगस्टाक जावपा आशिल्ल्या पंचायत वेंचणुकेचे फाटभुंयेर सत्तरी म्हालांतल्या बाराय पंचायतींनी हालचाली वाडल्या. उमेदवारी दाखल करचे खातीर फक्त पांच दीस उरल्यात. हाका लागून सत्तरी म्हालांतलया साबार गांवांनी वेगवेगळ्या पांवड्याचेर गटबाजीक ओतो आयला. सध्या पंचायत वेंचणुकांचे फाटभुंयेर पुराय सत्तरी म्हालांतलें वातावरण तापपाक लागलां, अशी म्हायती मेळ्ळ्या.
इत्सूक उमेदवार आपापले पद्दतीन मंत्री विश्वजीत राणे आनी आमदार दिव्या राणे हांचे वांगडा लॉबींग करपाच्या वावराक लागल्यात. पूण सध्यातरी राणे जोडप्यान पंचायत राजकारणांत कसलेच तरेची हस्तक्षेप करचो न्हय, असो निर्णय घेतला. हाका लागून तांच्या खूबशा समर्थकांची अडचण जाल्या.
सत्तरी म्हालांत केरी, मोर्ले, पर्ये, होंडा, पिसुर्ले, भिरोंडें, होंडा म्हावूस, ठाणे, नगरगांव, खोतोडें, गुळेली, सांवड्डें अश्यो बारा पंचायती आसात. तातूंतल्यो आठ पंचायती पर्ये मतदारसंघांत येतात जाल्यार उरिल्ल्यो चार सत्तरी मतदारसंघांत येतात. वट्ट 97 प्रभागांनी वेंचणुको जातल्यो. अंदूं इत्सूक उमेदवारांची हिसपा भायर गर्दी जाल्या. फाटल्या तीन दिसांनी जे तरेन उमेदवारी अर्ज व्हेल्यात ताचे वयल्यान अंदूं सगळ्याच प्रभागांनी चौरंगी वा पंचरंगी लडती जावपाची शक्यताय आसा.
सरकारान हालींच जारी केल्ल्या आरक्षणाक लागून खूबशे आदले सरपंच, आदले पंच हांची व्हड प्रमाणांत गोची जाल्ल्याचें चित्र पळोवपाक मेळटा. बायलांक 33 टक्के आरक्षण जाहीर केलां. ताका लागून खूबशे आदले सरपंच आनी आदले पंच हांचे मुखार समस्या आनीक वाडल्या. कांय आदल्या पंचांनी दुसऱ्यांच्या प्रभागांनी आपलो राजकी फुडार तपासपाचो निर्णय घेतला. मेळिल्ले म्हायती प्रमाण मंत्री विश्वजीत राणे आनी आमदार दिव्या राणे हांचो आशिर्वाद मेळ्ळ्यार खंयच्याय प्रभागांत सहज वेंचून येवप शक्य आसा, अशी हवा निर्माण जाल्या. हाका लागून नव्या उमेदवारांनी तशेंच आदले सरपंच आनी पंचांनी तांचो आशिर्वाद मेळोवपा खातीर व्हड प्रमाणांत धडपड सुरू केल्या. कांय इत्सूक उमेदवारांनी पणजेच्या तांच्या बंगल्यार भेट घेवन आपलें म्हणणें तांचे मुखार मांडपाचोय यत्न केला. मात राणे जोडप्यान पंचायतीच्या राजकारणांत मातूय पडपाचें ना, अशें स्पश्ट केल्ल्यान इत्सूक उमेदवार निरशेल्यात.
मतदार जाला शिटूक
मंत्री आनी आमदारांचो आशिर्वाद मेळचो आनी तांच्या नांवाचो वापर करून वेंचणूक रिंगणांत देंवपाचो खूब जाणांनी हालचाली सुरू केल्यात. मात मतदार शिटूक जाला. हे खेपे मतदार उमेदवारांच्या फटकिऱ्या आस्वासनांचे भकीक पडचो ना आनी विचार करून आपलें मत दितलो, अशें चित्र सध्या सत्तरी म्हालांत दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
