भांगरभूंय | प्रतिनिधी
प्रदुशण नियंत्रण मंडळाच्या अहवालांत म्हायती
पणजीः प्रदुशण नियंत्रण मंडळाच्या अहवाला प्रमाण, राज्यांतल्यो मुखेल न्हंयो, तळयो, खाडी, झरे, धरणां तशेंच बोअरवेलांतलें उदक प्रदुशीत जालां. ह्या उदकांतले प्राणवायूचें प्रमाण मर्यादे परस उणें जालां. जाल्यार फिकल कॉलिफॉर्म ह्या घातक जिवाणूंचें प्रमाण वाडलां.
अहवाला प्रमाण, साळ न्हंंय, कोलवा खाडी, मांडवी न्हंय, रायतळें, मयें तळें, शेल्डें तळें, नंदा तळें, दशी तळें, बाती तळें, सालमोणा झर, चापोली धरण, कुंडय, बेतोडें, सांकवाळ हांगाच्या बोरवेलींतल्या उदकांत पीएचचें प्रमाण उणें जालां. हें प्रमाण उणें जाल्ल्यान उदकांतले आम्ल गुणधर्म वाडून ते सजिवांच्या जिविताक धोक्याचे थारता.
उदकांत मिसळिल्लो प्राणवायू जलचरां खातीर गरजेचो. हाचें प्रमाण उणें जाल्यार जलचरांक घातक थारता. राज्यांत सायपे, कुडटरी, कोठंबी, रायतळें, शेल्डें तळें, साळ न्हंय, कोलवा खाडी, बेतोडें नालो, सांत इनेज खाडी आनी कुंकळ्ळी, सांकवाळ, खोर्ली, पिळर्ण हांगाच्या बोरवेलींतल्या उदकांतल्या प्राणवायूचें प्रमाण उणें जालां. थंयच्यो बायो केमिकल ऑक्सीजन डिमांट (बीओडी) प्रमाणा भयर वाडिल्ल्याचें अहवालांत स्पश्ट केला.
साळ, म्हापशें, जुवारी, तेरेखोल, शापोरा, मांडवी ह्या न्हंयांनी फिकल कॉलिफॉर्म जिवाणूंचें प्रमाण वाडलां. मिरामार, कळंगूट, मोरजी, मोबोर, बायणा, गालजीबाग, कोलवा, वागातोर आनी वेळसांव हांगाच्या दर्यादेगे वयल्या उदकांतूय फिकल कॉलिफॉर्मचें प्रमाण मर्यादे परस चड आसा.
अहवाला प्रमाण प्रदुशणाक लागून साळ, म्हापशें, जुआरी, तेरेखोल, मांडवी ह्यो न्हंयो मर्यादे परस चड प्रदुशीत जाल्यात. तशेंच खडूळ जाल्यात. तशेंच वेळसांव, वागातोर आनी मिरामार दर्यादेगेर उदकूय चड खडूळ जावन प्रदुशीत जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
