भांगरभूंय | प्रतिनिधी
भांगरभूंय । प्रतिनिधी
पोरणे गोंयः नाभीक समाजांतल्या तरणाट्यांनी आपल्या पारंपरीक वेवसाया विशीं न्यूनगंड बाळगुवचो न्हय. ताका नव्या साधनांची आनी तंत्रगिन्यानाची जोड दिवन तो करचो अशें आवाहन गोवन वार्ता लायव्हाचे संपादक किशोर नायक गांवकार हांणी केलां. अखील गोमंतक नाभीक समाजाच्या 36व्या वर्धापन दिसा निमतान गोमंतेश्वर देवळाच्या सभाघऱांत आयोजीत केल्ले कार्यावळींत मुखेल वक्ते म्हणून ते उलयताले.
माचयेर मुखेल सोयरे गोंय राज्य अनुसूचीत जाती आनी ओबीसी वित्त आनी उदरगत आयोगाचो अध्यक्ष तशेंच भोवजन समाजाचे अध्यक्ष अनिल होबळे, ज्येश्ठ निवृत्त शिक्षक रामचंद्र शिरोडकार, समाजाची अध्यक्ष डॉ सुजाता रायकार, गोमंतेश्वर देवस्थानाचो अध्यक्ष लक्ष्मीदास मणेरकार, सचीव लाडू सुर्लकार आशिल्ले.
राज्यांतल्या ओबीसींच्या लोकसंख्येंत नाभीक समाजाचो सातवो नंबर लागता. सामाजीक आनी अर्थीक बाबतींत हो समाज हेर ओबसी समाजांपरस बरो आसा. मात आपल्या पारंपरीक वेवसाया विशीं तरणाटे पिळगेंत जो न्यूनगंड पातळ्ळा तो बरो न्हय. ह्या वेवसायांत अर्थीक उत्पन्नाची बरी संद आसा. रोजगाराची आनी अर्थीक उन्नती करपाची ताकद ह्या वेवसायांत आसा. शिक्षणाचो समाजांत प्रसार जावप गरजेचें आसा. मात ताचो अर्थ फकत सरकारी नोकऱ्यो असो समज करून समाज आपलें लुकसाण करून घेता अशें नायक गांवकार हांणी फुडें सांगलें.
ओबीसी आयोगा वतीन उद्देग, वेवसायां खातीर कमी कळंतरांत अर्थीक सहाय्य करतात. हे येवजणेचे पशये फारीक करपाचे आसनात अशी मानसिकता बाळगून कोणूय तांचो आप प्रेरणेन फुडे सरून प्रामाणीकपणान उपेग करनात अशें अनिल होबळे हांणी सांगलें. समाज फुडें सरपा खातीर ताचो सामाजीक आनी अर्थीक स्तर वाडपाक जाय अशें तांणी सांगलें.
रामचंद्र शिरोडकार आनी डॉ सुजाता रायकार हांचे ह्या वेळार उलोवप जालें. लक्ष्मीदास मणेकर हांणी सुरवेक सगल्यांक येवकार दिलो. कार्यावळींत धावी आनी बारावेचे परिक्षेंत उल्लेखनीय कामगिरी केल्ल्या विद्यार्थ्यांक शिश्यवृत्ती भेटयली. समाजा खातीर काम केल्ले ज्येश्य समाज भाव तशेंच समाजाचो वेवसाय स्वाभिमानान फुडें व्हरपी तरणाटे वेवसायीक आनी समाजाच्या तालुको अध्यक्षांचो भोवमान मानेस्तांचे हस्तुकीं केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
