भांगरभूंय | प्रतिनिधी
चवथ लागीं आयली काय चवथीच्यो बर्यो- वायट गजाली याद जातात. दिवाळी अायली काय आकाशदिवो, नरकासूर, विंगड विंगड तरांच्या फोवांची याद जागी जाता आनी मन भुल्लुसपाक लागता.
काल रातभर वाड्यार नरकासूर करपाचो, ताका जाता तितलें भिरांकूळ दिसपी राकेसाचें रुप दिवपाचो सुवाळो चालू आशिल्लो. पोटांत, हाता- पायांत घालपाक तण एकठांय कर, कोंण्याच्यो बडयो लागीं कर, चवथीक उरिल्ले माराण हाड…. हीं सगळीं कामां रातभर चालू आशिल्लीं… आनी नकळटां म्हज्यो यादी म्हाका ल्हानपणांतल्या नरकासूरा लागीं घेवन गेल्यो.
आतांच्या सारक्यो त्या वेळार नरकासूराच्यो सर्ती नाशिल्ल्यो. पूण ल्हान- व्हड नरकासूर दरेका वाड्यार करताले. खबरापत्रांचे शेळे जाल्ले पेपर नरकासूर रंगोवपाक वापरताले. त्या वर्सा वाड्यावेल्या पोरांनी सगळ्यांत व्हडलो नरकासूर करपाचें थारायलें. रातभर जागून तो तयार केलो. एकट्यान धव्या कोराची दाट फोल घेवन रान्नींतलो कोळसो घेवन तो रंगयलो आणि रुपडे तयार जाले. ताज्यो मिशयो, खाड काळें कुळकुळीत दिसपाक जाय म्हूण कोळसो उदकान ओलो केलो आनी नरकासूराचें खाड- मिशी दात अक्राळ विक्राळ करुन उडयले.
आमच्या घराकुशीकच मळ आसा. थंय एक धाकटी खोप बांदली आनी नरकासूराक खोपीच्या भायर उबो केलो. फांतोड जातकूच पत्र्याचे डबे वाजयत, टाळ कुटीत आमी ताका उजो घालपाची मोख दवरली. नरकासूर उबो करतकच चण्याची उसळ आनी फुटी च्या ढोसपाचो सुवाळो रंगार आयलो. आनी इतक्यात वाड्या वेलो नरसो एक खबर घेवन आयलो…….
‘कुयटाक साकुन फेर्नांद सकाळचे फ्लायटीन गोंयां पावला. सांजमेरेन वाड्यार पावतलो.’ सगळेजाण तो सांगता तें कान दिवन आयकताले. ‘ताणें भायल्यान व्हीसीआर आनी कॅसेटी हाडल्यात. आज रातचो फेर्नांदागेर विडियोर सिनेमा पळोवपाचो बेत फिक्स जाला.’आयकून सगळ्यांनी टाळयोच मारल्यो. सगले रातभर पिक्चरां पळोवपाचीं सपनां रंगोवंक लागले. तिनसांज जाली तशी मळावेली खोप रिती जाली. फकत नरकासूर खोपी भायर एकटोच उरिल्लो.
फेर्नांदान वाड्या वेल्या, गांवच्या लोकांक हुनहुनीत येवकार दिलो. व्हीसीआर सेट केलो… आनी पयलीं अमिताभ बच्चनाचो जंजीर, मागीर ब्रूस लीचो रिटर्न आॅफ द ड्रॅगन, राजेश खन्नाचो आनंद… फाटोफाट सिनेमा पळयतां पळयतां केन्ना फांतोड जाली कळ्ळेंच ना. मळार नरकासूर सगळ्यांची वाट पळयतालो. सगळ्यांनी फेर्नांदाक दिवाळेचीं परबीं दिली आनी हुयेली, किळाटी मारीत मळार धांवले. पूण खोपी भायर कोण ना. नरकासूर गायब. एकट्या देड शाण्यान सांगले की दंवान भिजत म्हणून तो खोपींत वचून बसला आसतलो. सगले खोपीन गेले. पूण नरकासूर ना! रातभर खोपींत बशिल्लें सुणे भोंकीत आंगार आयले आनी ते भुरगे मळार रातची भुताटकी जाल्या आसतली, अशें समजून घरा परतले. घरा वतना सगळ्यांनी मेळून शिमेवेल्या सांतेरीक गाराणें घाले आनी चोर कोण तो दाखय अशी आंगवण करून पांच केळी, नाल्लाची होटी दवरपाचें उतर दिलें.
दनपरां एकामेकांगेर फोव खावन सहज म्हणून मळाचेर गेले. पळयत जाल्यार कितें? एका कोनशाक नरकासूर लाशिल्लो दिश्टी पडलो. गांवभर बोवाळ. पूण, चोर आयज मेरेन सांपडूंक ना.
जाणटे सांगपाक लागले, नरकासूराचो गांवांचेर कोप जाला. भुरग्या कडल्यान ताची वर्स पद्दती प्रमाण सेवा जावंक ना. ताका लागून तांणे स्वताच लासून घेतलां आसतलें आनी हाचे खर परिणाम गांवांक भोगचे पडटले……आनी ह्यो सगळ्यो आडमेळी नाकात जाल्यार देंवचाराक बुधवार, आयतारा ‘रोंट’ घालचे पडटले !!
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
