भांगरभूंय | प्रतिनिधी
-येरादारी नेम मोडिल्ल्या दोन हजार जाणांक चलन जारी
पणजी : बाणस्तारी अपघाता उपरांत परतून सादूर जाल्ल्या येरादारी पुलिसांनी सोऱ्याचे घुंवळेंत वाहन चलोवप्यांचेर खर कारवाय करपाक सुरवात केल्या. फाटल्या दोन दिसांत येरादारी पुलिसांनी सोऱ्याचे घुंवळेंत वाहन चलोवपी 28 वाहन चालकांचेर गुन्यांव नोंद केल्यात. जाल्यार येरादारी नेम मोडिल्ल्या सुमार दोन हजार जाणांक चलन जारी केलां.
फाटल्या आयतारा सोऱ्याचे घुंवळेंत आशिल्ल्या मर्सिडीझ मोटारीच्या चालकान भरधांव वेगान मोटार चलोवन बाणस्तारी पुलाचेर तिगांचो जीव घेतिल्लो, जाल्यार तिगांक गंभीर जखमी केल्ले. सुमार पांच वाहनांचें लुकसाण केल्ले. ह्या अपघाता उपरांत जागे जाल्ल्या येरादारी पुलिसांनी परतून एकदां सोरो पियेवन वाहन चलोवपी चालकांचेर कारवायेची मोहीम सुरू केल्या.
फाटल्या दोन दिसां पसून उत्तर आनी दक्षीण अशा दोनूय जिल्ह्यांनी ही मोहीम दिसा आनी रातीं वेळारूय सुरू केल्या. तातूंत सोरो पियेवन वाहन चलोवपी आनी येरादारी नेमांचे उल्लंघन करपी येरादारी पुलिसांच्या तांवडीत सांपडल्यात.
शुक्रार आनी शेनवार ह्या दोन दिसांत उत्तर गोंय पुलीस येरादारी पुलिसांनी सोरो पियेवन वाहन चलोवपी 16 जाणां आड गुन्यांव दाखल केल्यात, जाल्यार एक हजारा वयर जाणांक येरादारी नेमांचे उल्लंघन केल्ल्यान चलन जारी केलां, अशी म्हायती उत्तर गोंय येरादारी पुलीस अधिक्षक सिद्धांत शिरोडकार हांणी आमच्या प्रतिनिधी कडेन उलयतना दिली.
जाल्यार दक्षीण गोंय पुलिसांनी दोन दिसांत सोऱ्याचे घुंवळेंत वाहन चलोवपी 12 जाणां आड गुन्यांव दाखल केल्ल्याची तशेंच हजारा वयर जाणांक येरादारी नेम मोडिल्ले प्रकरणांत चलन जारी केल्ल्याचे दक्षीण गोंय येरादारी विभागांतल्या सुत्रांनी सांगलें.
पुलीस अलर्ट, तळीराम तावडेंत
-बाणस्तारी फाटल्या आयतारा रातीं पुलाचेर जाल्ल्या अपघातांत मर्सिडीझ चालक श्रीपाद उर्फ परेश सिनाय सांवड्डेंकार हांणी तिगांचो जीव घेतला, जाल्यार तिगांक जखमी केल्ले. अपघात घडलो त्या वेळार चालक सोऱ्याचे घुंवळेंत आशिल्ल्याचे वैजकी चांचणेंत सिद्ध जाला. सध्या तो पुलीस कोठडेंत आसा.
-पोरूं जुलयांत झुवारी न्हंयेच्या पुलाचो कठडो मोडून मोटार न्हंयेंत पडिल्ली. तातूंत चवगांक मरण आयिल्लें. त्या चवगांनीय वाडदिसाचे पार्टेत सोरो पियेल्लो आनी मोटार चालक भरधांव वेगान मोटार चलयतालो, हे उपरांत वैजकी चांचणेंत सिद्ध जाल्ले.
– सोऱ्याचे घुंवळेंत वाहन चलोवन जायते जाण सर्वसामान्य नागरिकांचे जीव घेतात, अशो घडणुको फाटल्या दोन वर्सां वाडल्यात. तातूंतच बाणस्तारी सारको भिरांकूळ अपघात जाल्ल्यान खडबडून जागे जाल्ल्या येरादारी पुलिसांनी अशा चालकांचेर खर कारवाय करपाची मोहीम सुरू केल्या.
बार्रां, पबा भायरूय पुलिसांची नदर
सांजे तशेंच रातच्या वेळार गर्दी जावपी बार्र, पब तशेंच कॅसिनो भायर साध्या भेसांतले पुलीस दवरून सोऱ्याचे घुंवळेंत आसपी चालकांचेर कारवाय करपाक येरादारी खात्यान सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
