देशाचें वाग संवर्धन धोरणूच चुकीचें

भांगरभूंय | प्रतिनिधी

वयम् संस्थेचे संस्थापक मिलिंद थत्ते हांचें मत

भांगरभूंय । प्रतिनिधी

पणजीः आमच्या देशांत आनीक वाग जाय, तांचो आंकडो आनीक वाडपाक जाय, अशी मानसिकता बाळगून वावुरप्यांचो हो अहंकार म्हणपाचो काय हट्ट, असो प्रस्न वयम् संस्थेचे संस्थापक मिलिंद थत्ते हांणी उपस्थीत केला. आमच्या देशाचें वाग संवर्धन धोरणूच चुकीचें आसा. आमच्या देशांत रानांनी वागां वांगडा रावपी मानवी संस्कृती आसा, हाचो विसर ह्या धोरणांत जाला. हें धोरण म्हणल्यार मनशांक रानांतल्यान भायर काडात, उपरांतूच वाग रावतले, असो विचार करपी आसा, जें पुराय चुकीचें आसा. गोंया सारक्या ल्हान प्रदेशांत जय रानांचो वाठारुय मर्यादीत आसा, थंय वाग वाठार जावप असैमीक आसा, अशें मत तांणी उक्तायलें.

गोवन वार्ता लायव्हचे संपादक किशोर नायक गांवकार हांकां ‘टू द पॉयंट’ हातूंत दिल्ले मुलाखतींत मिलिंद थत्ते हांणी ही म्हायती दिली.

रान हक्क आनी हेर कायद्यांनी दिल्ले संवैधानीक अधिकार, अनुसुचीत जाती- जमाती आनी रानांत रावपी लोकांक मेळचे हे खातीर वयम् ही लोकचळवळ सुरू करपांत म्हत्वाची भुमिका मिलिंद थत्ते हांची आसा. हालींच केंद्र सरकारान रान संवर्धन कायद्यांत केल्ल्यो दुरुस्ती आनी ताचे नेमके परिणाम ह्या विशया वयले हे मुलाखतींत गोंयांतले वाग वाठार घोशणेच्या विशयार तांकां प्रस्न विचारिल्लो, तेन्ना तांणी वयलें मत उक्तायलें.

देशाच्या वाग संवर्धन धोरणाचो पुनर्विचार करपाचो वेळ आयला. आमी रानांचीं जुवीं करपाक शकनात. सरभोंवतणी क्राँक्रिटाचीं रानां आनी मदीं खरें रान, थंय वाग येवन रावतलो, असो विचार करप शक्य आसा? एका वागाक सुमार 10 चौखम किलोमिटरांचो वाठार लागता. आमच्या देशांतल्या वागांचो आंकडो जो सरकारान अधिकृत पद्दतीन जाहीर केला, तांकांच आस्पावन घेवचे खातीर आमचे कडेन फावोशीं रानां नात. इतले सुवातेंत इतलेच वाग जगपाक शकतात, हें आमी मान्य करपाक जाय. आमच्या देशांतलीं सगळींच रानां कांय वागांक पूरक नात, अशेंय थत्ते हांणी स्पश्ट केलें.

आणी जे देशांत चिते हाडून दवरल्यात ते विशीं उलयतना थत्ते हांणी सांगलें, चित्याची शिकार करपाची सवंय ही आपल्या सावजाक धांवडावन धांवडावन, थकोवन शिकार करपाची आसा. ते खातीर कितल्याशाच मैलाचें अंतर चित्याक लागता. आमचें कडेन जे बिबटे आसात ते धांवून शिकार करिनात, ते थेट हल्लो करतात आनी ताका लागून तांकां उणी सुवात पुरो जाता. चित्याचें मात तशें ना. तो रातची शिकार करिना जाल्यार दिसाची करता. चित्याक जाय तशें मैलान मैल धांवपाचे पट्टे आमचे कडेन आसत जाल्यारूच हांगा चितो रावपाक शकता. गोंया सारक्या ल्हान राज्यांत जंय मुळांतूच रान वाठार उणो आसा, थंय वाग कसो राबितो करतलो आनी ताची प्रजाती वाडटली हो विचारूच असैमीक आसा. थळाव्या थळाव्या जनावरां कडेन कशें जुळोवन घेवचें हें आतां लोकांक बरे तरेन कळ्ळां. बिबट्यान एकाद्या सुण्याची वा गायेची शिकार केली जाल्यार व्हड बोवाळ करपाची ह्या लोकांक सवंय ना. तशें खूब कडेन रानांनी रावपी लोकां कडल्यान एकादे जनावर दर वर्सा वागाक बळी दिवपाची एक पद्दत आसा. रानांतल्या वागांची जगपाची पद्दत आनी आपली पद्दत हातूंतलो फरक ह्या लोकांक पिळग्यान पिळग्यो रानांतल्या राबित्यान कळ्ळा. खंयचीय प्रजाती स्वताचो वाठार सोडून दुसरे कडेन वाडना, हे सादे सत. तेच खातीर गोंयांत वाग वाठाराची कल्पना अयोग्य आनी चुकीची आसा, अशें थत्ते हांणी सांगलें.